Keshe «Nur Otan» partııasynyń Ortalyq apparatynda Májilistegi osy partııa fraksııasynyń janyndaǵy О́ńirlik saıasat jáne máslıhattarmen jumys jónindegi keńesiniń «Eńbek daýlarynyń aldyn alý jáne olardy sheshý máseleleri boıynsha qoldanystaǵy zańnamany jetildirý týraly» taqyrybynda dóńgelek ústel bolyp ótti.
Keshe «Nur Otan» partııasynyń Ortalyq apparatynda Májilistegi osy partııa fraksııasynyń janyndaǵy О́ńirlik saıasat jáne máslıhattarmen jumys jónindegi keńesiniń «Eńbek daýlarynyń aldyn alý jáne olardy sheshý máseleleri boıynsha qoldanystaǵy zańnamany jetildirý týraly» taqyrybynda dóńgelek ústel bolyp ótti.
Atalǵan sharaǵa fraksııanyń músheleri men basshylary, Joǵarǵy Sottyń, Bas prokýratýranyń, Eńbek jáne halyqty áleýmettik qorǵaý mınıstrliginiń, Munaı jáne gaz mınıstrliginiń, oblystyq máslıhattardyń, kásipodaqtardyń jáne buqaralyq aqparat quraldarynyń ókilderi qatysty. Dóńgelek ústeldiń maqsaty, qoldanystaǵy eńbek zańnamasyn jetildirý, kemshilikter men kollızııalardy joıý jónindegi usynystardy jasaý, eńbek daýlarynyń aldyn alýdyń jáne sheshýdiń tıimdi júıesin qalyptastyrý boldy.
Sharany Keńes tóraıymy, Májilis depýtaty Gúlnar Seıitmaǵanbetova sóz sóılep ashty. Quqyqtyq bazadaǵy olqylyqtardan búgingi tańda qoldanystaǵy zańnamamyz eńbek qatynastarynyń deńgeıin tolyqtaı qamtamasyz ete almaýda, degen depýtat sonyń kesirinen eńbek daýlarynyń, janjaldardyń bolýy, keı jaǵdaıda olardyń uzaq merzimge sozylýy jıi kezdesetindigine toqtaldy.
Keltirilgen málimetterge qaraǵanda, 2011-2012 jyldar aralyǵynda elimizde 35-ke tarta eńbek daýy oryn alypty. Al bıyldyń ózinde mundaı narazylyq aksııalarynyń sany 27-ge jetken. Eńbek janjaldarynyń barlyǵyn saralaǵanda, 57 paıyzy jalaqynyń mezgilinde tólenbeýine qatysty bolsa, 40 paıyzy jalaqynyń mólsherine, al 3 paıyzy, ıaǵnı bireýi kásiporyn jumysynyń toqtap qalýyna baılanysty eńbek sharttarynyń buzylýyna qatysty bolǵan. Ekonomıkada memlekettik emes sektorlardyń ulǵaıýy, jumyskerlerdiń ózderiniń quqyǵyn tolyq bilýge umtylysy men ony qorǵaý qajettiligi eńbek daýlaryna ulasýda.
Depýtattar bul rette jumysshymen mindetti túrde eńbek shartyna otyrý, eńbekaqyny ýaqtyly tóleý, eńbek qaýipsizdigin zańmen retteý jáne ony buzǵany úshin jaýapkershilikti kúsheıtý máselesin ótkir qoıdy. Ásirese, saqtandyrý kompanııalary tarapynan óndiriste zardap shekken jumysshyǵa tıisti tólenýi tıis tólemderdi júzege asyrmaǵany úshin jaýapkershilik qarastyrýǵa, ártúrli eńbek daýlary sotqa deıingi medıasııa tásilderin qoldaný arqyly sheshýge zańdyq tetikterdiń qajettigi basa aıtyldy. Eńbekaqy tóleýdegi zańsyzdyqtar saldarynan jumysshy men jumys berýshi arasyndaǵy jergilikti daýlar kúrdelenip, janjaldarǵa, tipti ereýilderge ulasyp jatady.
Keńes tóraıymy kóptegen jumys berýshiler úshjaqty kelisimderdi usynym retinde qarap, ony oryndaý qajettigine nazar qoımaı otyrǵandyǵyna qynjylys bildirdi. Bul turǵyda kelisimge qatysýshylarǵa, ásirese, jumys berýshilerge qatysty ákimshilik, tipti, qylmystyq jaýapkershilik normalaryn zań júzinde aıqyndap bekitý qajettiligi týyndaıdy, dedi Gúlnar Súleımenqyzy.
Sondaı-aq, dóńgelek ústelde eńbek daýlarynyń aldyn alý jáne olardy sheshý boıynsha Eńbek jáne halyqty áleýmettik qorǵaý vıse-mınıstri K.Ábsattarov jan-jaqty baıandap berse, Joǵarǵy Sot sýdıasy E.Smaıylov eńbek daýlary boıynsha sot tájirıbesiniń jınaqtalǵan aqparattarymen bólisti. Budan basqa, birneshe sheshen sóz alyp, eńbek daýlaryn sheshý júıesin jetildirýge qatysty oı-pikirlerimen bólisti. Sonyń ishinde bıznesti, eńbek nátıjesine jumyskerdi yntalandyrýǵa turaqty quqyqtyq baza talap etiletindigi de atap aıtyldy.
Talqylaý qorytyndysy boıynsha Úkimet pen Parlament depýtattaryna zańdylyq bastamashy quqyǵynyń ıegerleri retinde usynymdar qabyldandy. Jáne de birqatar mınıstrlikterge, Sot ákimshiligi jónindegi komıtetke eńbek daýlaryn boldyrmaýdyń tetikterin ázirleý jónindegi usynystar da aıtylmaı qalmady.
Asqar TURAPBAIULY,
«Egemen Qazaqstan».