Batys Qazaqstan oblysynyń mamandandyrylǵan aýdanaralyq ekonomıkalyq soty «Ýral Oıl end Gaz» kompanııasyna iri kólemde aıyppul saldy. Bul týraly «Habar» telearnasy habarlady.
Atalǵan kásiporyn 2000 jyldan beri Fedorovka aýyly mańynda kómirsýtegi shıkizatyn barlaýmen aınalysyp keledi. Al 5 jyl buryn kásiporyn «Rojkovo» ken ornynda munaı, gaz jáne gaz kondensatyn óndirgen bolatyn. Alaıda, kompanııa jyl boıy qajetti normadan joǵary kólemdegi 250 tonnadaı las zattardyń aýaǵa taralýyna jol beripti. Sondyqtan qorshaǵan ortaǵa aıtarlyqtaı zalal keltirgen kásiporynǵa 800 mln.teńge kóleminde aıyppul salyndy. Batys Qazaqstan oblysyndaǵy mamandandyrylǵan tabıǵatty qorǵaý prokýrory Aslan Jańataýovtyń aıtýy boıynsha, prokýrorlyq yqpal etý sharalaryn qoldaný nátıjesinde atalǵan soma tolyǵymen bıýdjet esebine óndirilgen.
Baqytbek Keneshuly.
Derekkóz: «Habar» telearnasy.