Keshe Aqordada Elbasy Nursultan Nazarbaev elimizdiń basty merekesi – Táýelsizdik kúni qarsańynda respýblıkanyń áleýmettik-ekonomıkalyq jáne mádenı damýyna eleýli úles qosyp kele jatqan bir top azamatqa joǵary memlekettik nagradalar tapsyrdy. Bul kúni Memleket basshysynyń qolynan nagrada alǵandar qatarynda densaýlyq saqtaý, aýyl sharýashylyǵy óndirisi, bilim, ekonomıka, óner salalarynyń kórnekti ókilderi, quqyq qorǵaý organdarynyń qyzmetkerleri men áskerı qyzmetshiler boldy.
Keshe Aqordada Elbasy Nursultan Nazarbaev elimizdiń basty merekesi – Táýelsizdik kúni qarsańynda respýblıkanyń áleýmettik-ekonomıkalyq jáne mádenı damýyna eleýli úles qosyp kele jatqan bir top azamatqa joǵary memlekettik nagradalar tapsyrdy. Bul kúni Memleket basshysynyń qolynan nagrada alǵandar qatarynda densaýlyq saqtaý, aýyl sharýashylyǵy óndirisi, bilim, ekonomıka, óner salalarynyń kórnekti ókilderi, quqyq qorǵaý organdarynyń qyzmetkerleri men áskerı qyzmetshiler boldy.
Saltanatty rásimdi ashardaǵy kirispe sózin jınalǵandardy Qazaqstan Respýblıkasy Táýelsizdigi merekesimen quttyqtaýdan bastaǵan Prezıdent Nursultan Nazarbaev egemendik jyldarynda elimizde kóptegen ozyq dástúrlerdiń paıda bolǵanyn aıta kelip, sonyń bastylarynyń biri adam eńbegin laıyqty baǵalaý, sol arqyly qazaqstandyq patrıotızmdi qalyptastyrý ekenin atap ótti.
– Endi eki kúnnen keıin Qazaqstannyń óz táýelsizdigin jarııalaǵanyna 22 jyl tolady. Bul – Qazaqstandy búkil álem tanyǵan kún, – dedi Nursultan Ábishuly. – Osy ýaqyt aralyǵynda bizdiń qol jetkizgen basty jetistikterimizdiń biri retinde adamdardy eńbek daǵdysyna úıretkenimizdi aıtyp ótken lázim. «Er eńbegimen eńseli» degen sóz bar. Biz sondaı eńseli erlerdiń eńbekterin árdaıym laıyqty baǵalap, olardy jyl saıyn Qazaqstannyń basty jalpyulttyq merekesi qarsańynda marapattap otyrýdy úlgili úrdiske aınaldyrdyq. Munyń óte joǵary sımvoldyq máni bar. О́ıtkeni, memleketimizdiń táýelsizdigi osy jyldar ishinde sizder men bizderdiń, ıaǵnı árbir jeke adamnyń eńbeginen quralady.
– Bizdiń táýelsizdik jyldarynda eren eńbektiń ólshemin bildiretin bir belesimiz «Qazaqstannyń Eńbek Eri» degen joǵary ataqty ómirge keltirgenimiz boldy, – dedi Elbasy. – Beıneti qattynyń zeıneti tátti. Mine, búgin sondaı el aldyndaǵy erekshe eńbekteriniń arqasynda «Eńbek Eri» atanǵandar qatary taǵy úsh adamǵa artyp otyr. Olardyń biri – dáriger bolsa, ekeýi – aýyl sharýashylyǵy óndirisiniń maıtalmandary. Osyndaı zor ataqqa qol jetkizip otyrǵan úsh azamatymyz da eldiń ıgiligi jolynda aıanbaı ter tógip keledi.
Memleket basshysy óz sózinde patrıotızm, óz isine berilgendik, Otan ıgiligi jolyndaǵy qajyrly eńbek, qyzmeti men kásibine qaramastan, marapattalǵandardyń barlyǵyn bir ortada biriktiretinine toqtaldy.
– Bizdiń bárimiz nagrada alý úshin emes, ózimizdiń kúndelikti isimizdi adal atqarý úshin jumys isteımiz, – dedi budan ári Prezıdent. – Adam súıikti isine jan-tánimen berilip, oǵan óziniń barlyq kúsh-jigerin jumsaǵan kezde nagrada men moıyndaý ony ózi tabady. Biz úshin eń qundy ortaq nagrada – jańa bıikterdi baǵyndyryp kele jatqan, kúlli álemge tanylǵan óskeleń Qazaqstan. О́te jaqsy atqarylǵan jumys úshin eń jaqsy marapat – jumysty odan ári jaqsy atqarýǵa múmkindik berý deıdi ǵoı. Bizdiń qoǵamnyń asa mańyzdy qundylyǵy – ony biriktirýshi qajyrly eńbek. Sondyqtan memleket atynan biz óz eńbegimen zor tabysqa jetken azamattarǵa erekshe qurmet kórsetemiz. Olaı bolsa, «Qazaqstannyń Eńbek Eri» ataǵy osy qatardan kórinip otyrǵan Abzal Jumashuly Erálıevke, Iýrıı Vladımırovıch Pıaǵa jáne Ivan Adamovıch Saýerge beriledi.
Nursultan Nazarbaev Qyzylorda oblysynyń Syrdarııa aýdanyndaǵy «Abzal jáne K» seriktestigi men onyń dırektory Abzal Erálıevtiń qyzmetine erekshe toqtaldy.
– Búginde seriktestik kúrishtiń túsimi boıynsha Qyzylorda oblysynda kósh bastap keledi. Kompanııada kúrish ósirýden bastap, daıyn ónimdi dúken sórelerine jetkizýge deıingi tolyq óndiristik sıkl engizilgen, – dedi Prezıdent. – Kásiporyn, sondaı-aq, kúrishti shetelge basty eksporttaýshy da bolyp tabylady. Ol adamdardy jumyspen qamtyp qana qoımaı, áleýmettik salaǵa turaqty túrde ınvestısııa salady. Men bul sharýashylyqta birneshe ret boldym jáne ol turǵan jerde saıabaqtary, áleýmettik nysandary men jaqsy ómir súrý úshin qajetti nárseniń bári bar gúldeı jaınaǵan naǵyz qalashyqty kórip tańǵaldym.
Memleket basshysy Iýrıı Pıa basshylyq etetin Astana qalasyndaǵy Kardıohırýrgııa ulttyq ǵylymı ortalyǵy búginde búkil respýblıkaǵa jáne shetelderge de belgili ekenin atap ótti.
– Ol myńdaǵan eresekter men balalar úshin úmit pen shıpagerlik nyshany bolyp sanalady, óıtkeni, ol jańa ómir syılady, – dedi Nursultan Nazarbaev. – Ortalyq qysqa merzimde barlyq jańa tehnologııany ıgerdi jáne álemde moıyndaldy. Memleket basqa da biregeı ortalyqtar saldy. Densaýlyq saqtaý salasyna zor kóńil bólinýde, qarjylandyrý jyl saıyn artýda. Osy salaǵa bólinetin qarajattyń ishki jalpy ónimge qatysty kólemi boıynsha biz damyǵan elder qataryna jaqyndadyq. Alaıda, búginde qajetti jumysty ǵımarat pen jabdyqtar emes, naqty aıtsaq, mamandar oryndaıdy. Qazir Iýrıı Pıa ózderiniń biregeı ázirlemelerin jasaý tabaldyryǵynda tur. Bıylǵy jyly elimizde júrekke 40 myńnan astam ártúrli ota tabysty jasaldy. Al olardy shetelderde jasatatyn bolsaq, asa kóp shyǵyn ketken bolar edi.
Qazaqstan Prezıdenti Ivan Saýer basqaratyn Aqmola oblysyndaǵy «Rodına» agrofırmasynyń jumysyna da zor baǵa berdi.
– «Rodına» agrofırmasy – aýyl sharýashylyǵy isin júrgizýdiń naǵyz úlgisi. Mysaly, kásiporyndaǵy eńbek ónimdiligi bir jumyskerge 38 myń dollar bolady. Bul – rekord, sebebi, elimiz boıynsha bul kórsetkish 7 myń dollarǵa ǵana teń. Eger, jalpy alǵanda, agrarlyq sektorda ónimdilik «Rodınanyń» kórsetkishiniń jartysyna jaqyndaǵan bolsa, onda ónim kólemi basqasha bolar edi. Munda óndiristi minsiz damytyp qana qoımaı, áleýmettik baǵdarlamalardy júzege asyrýǵa jaýapkershilikpen qaraıdy. Fırmanyń eńbekkerleri jumys isteıtin kentte sporttyq jáne áleýmettik nysandar, jaqsy joldar, aýrýhanalar salynǵan, jylý berý júıesi ornatylǵan, – dedi Memleket basshysy.
Qazaqstan Prezıdenti joǵary memlekettik nagradalar ǵalymdarǵa, mádenıet pen óner, bilim berý men densaýlyq saqtaý salalarynyń qaıratkerlerine, óndiris ıelerine, qoǵam qaıratkerlerine, áskerı qyzmetshilerge, quqyq qorǵaý organdarynyń qyzmetkerlerine tapsyrylatynyn aıtty.
– Sizderdiń bárińiz jańa Qazaqstandy qura otyryp, barynsha úzdik nátıjelerge qol jetkizý úshin kúsh-jigerlerińiz ben talanttaryńyzdy aıanbaı jumsap kelesizder, – dep atap ótti Nursultan Ábishuly. – Men sizderdiń jetistikterińiz óz áriptesterińizdi jáne barlyq azamattardy zor bıikterge jigerlendiretinine senemin. О́ıtkeni, bizdiń aldymyzda jańa, anaǵurlym aýqymdy maqsattar tur. Naq osyndaı jasampazdyqpen alǵa qadam basý – táýelsizdigimizdiń basty mán-maǵynasy.
Memleket basshysy osydan keıin «Halyqaralyq bıznes ýnıversıteti» JShS prezıdenti Kenjeǵalı Saǵadıev pen «Qazatomónerkásip» UAK» AQ basqarma tóraǵasy Vladımır Shkolnıkke «Otan» ordenin, Atyraý oblysynyń ákimi Baqtyqoja Izmuhambetovke «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev» ordenin tabys etti. Al «Barys» ordeniniń tıisinshe úsh dárejesimen «QazMunaıGaz salynatyn kásiporyndar dıreksııasy» JShS bas dırektory Nurlan Balǵymbaev, Eýrazııalyq ekonomıkalyq qoǵamdastyqtyń bas hatshysy Taıyr Mansurov jáne Qazaqstan Respýblıkasynyń Syrtqy ister mınıstri Erlan Ydyrysov marapattaldy. Bul kúni «Parasat» ordeni Qazaqstan Respýblıkasy Memlekettik qyzmet isteri agenttiginiń tóraǵasy Álıhan Baımenov pen Qazaqstan Respýblıkasy Premer-Mınıstriniń birinshi orynbasary Baqytjan Saǵyntaevtyń omyraýlaryna taǵyldy.
Kelesi kezekte «Abaı atyndaǵy Qazaq memlekettik akademııalyq opera jáne balet teatry» RMK ártisi Sáýle Albers, Qazaqstan Respýblıkasy Joǵarǵy Sotynyń azamattyq jáne ákimshilik ister jónindegi qadaǵalaýshy sot alqasynyń tóraǵasy Elis Ábdiqadyrov, Qazaqstan Respýblıkasy Ekonomıka jáne bıýdjettik josparlaý mınıstri Erbolat Dosaev, Soltústik Qazaqstan oblysyndaǵy Ǵabıt Músirepov atyndaǵy aýdannyń «Nejınka-Erke» JShS brıgadıri Nadejda Kolkovskaıa, «N.Sas atyndaǵy balalar men jasóspirimderge arnalǵan memlekettik akademııalyq orys teatry» RMK ártisi Olga Korjeva, Qazaqstan Respýblıkasy Qorshaǵan orta jáne sý resýrstary mınıstri Nurlan Qapparov, Ońtústik Qazaqstan oblysy Maqtaaral aýdanyndaǵy B.Momyshuly atyndaǵy №6 mektep-gımnazııa dırektory О́mirhan Qozybaq jáne Almaty oblysynyń ákimi Ańsar Musahanov «Qurmet» ordeniniń ıegerleri atandy.
Saltanatty sátte áskerı jáne qyzmettik boryshtaryn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin áskerı qyzmetshiler, quqyq qorǵaý organdary ókilderiniń bir toby II dárejeli «Dańq» ordenimen, I, II jáne III dárejeli «Aıbyn» ordenderimen jáne «Erligi úshin» medalimen nagradtaldy. Olardyń qatarynda II dárejeli «Dańq» ordenine Almaty qalalyq ekonomıkalyq qylmysqa jáne sybaılas jemqorlyqqa qarsy kúres departamentiniń bastyǵy Ámirhan Amanbaev, Ońtústik Qazaqstan oblystyq ekonomıkalyq qylmysqa jáne sybaılas jemqorlyqqa qarsy kúres departamentiniń bastyǵy Serikbaı Erimbetov, Qazaqstan Respýblıkasy Ishki ister mınıstriniń orynbasarlary Erlik Kenenbaev jáne Amantaı Kúreńbekov, Qazaqstan Respýblıkasy Qorǵanys mınıstriniń orynbasary Baǵdat Maıkeev, Pavlodar oblysynyń prokýrory Dastan Sartaev, Ulttyq qaýipsizdik komıtetiniń departament bastyǵy Seıitjan Shalabaev boldy. Al I dárejeli «Aıbyn» ordeni Respýblıkalyq ulannyń bas ınspektory Meıram Mahatovqa, II dárejeli «Aıbyn» ordeni Qazaqstan Respýblıkasy Qarýly Kúshteri Áýe qorǵanysy kúshteri bas qolbasshysy basqarmasynyń bólim bastyǵy – ushýlar qaýipsizdigi jónindegi bas ınspektor Qaırat Baımahanov pen Qazaqstan Respýblıkasy Prezıdenti Kúzet qyzmetiniń departament bastyǵy Rústem Chakenovke, al «Erligi úshin» medali Astana qalasy ishki ister departamenti patrýldik polısııa polkiniń polıseıi Medet Sasanovqa tapsyryldy.
Saltanatty rásim barysynda memlekettik nagradalar ıeleri attarynan Abzal Erálıev, Iýrıı Pıa, Ivan Saýer, Kenjeǵalı Saǵadıev jáne Olga Korjeva ózderiniń eńbekterin joǵary baǵalaǵany úshin Qazaqstan Prezıdentine zor alǵys sezimin bildirdi.
Saltanatty rásimniń sońynda Memleket basshysy barlyq laýreattardy marapattarymen taǵy bir ret quttyqtap, elimiz olardyń eńbegin laıyqty baǵalaıtynyn atap ótti.
– Bul sizder úshin qýanyshty oqıǵa ári úlken jaýapkershilik dep oılaımyn. Sizderge qarap ózgeler ósedi, osyndaı bıikterge jetý úshin ózge úmitkerler umtylady. Elimizdiń uly merekesi – Táýelsizdik kúnimen quttyqtaımyn. Barshańyzǵa zor baqyt, baq-bereke tileımin. Eńbekterińiz úshin rahmet, – dedi Nursultan Nazarbaev sóziniń túıininde.
Shara sońynda nagrada alǵandar Prezıdentpen birge eskertkish sýretke tústi.
Serik PIRNAZAR,
«Egemen Qazaqstan».