Qyzylorda oblysynda mádenıet salasy boıynsha 2020-2021 jyldarǵa arnalǵan «Jumyspen qamtýdyń Jol kartasy» aıasynda 22 joba iske asyryldy. Bul týraly kommýnıkasııalyq qyzmet ortalyǵynda ótken brıfıngte oblystyq mádenıet, arhıvter jáne qujattama basqarmasynyń basshysy Mıra Ábýova habarlady.
Mádenıet salasy ókilderiniń tilshilermen kezdesýinde oblystyq fılarmonııa janynan salynǵan qosymsha ǵımarat jaıly da aıtyldy.
- Jańa ǵımaratta daıyndyq zaly, tigin sehy, ashana jáne kıim qoımasy ornalasqan. Keń, eń bastysy jaryq, ártisterdiń shyǵarmashylyqpen aınalysýyna qolaıly. Bıyl karantındik talaptardy saqtaı otyra jańa maýsym 11 qańtarda bastaldy,- dedi oblystyq fılarmonııa dırektory Talǵat Maqashov.
Jyl basynan beri fılarmonııa 10 shara ótkizip, oǵan 700-den asa kórermen qatysty. Buǵan qosa, gastroldik saparlar jaıly ózge konserttik uıymdarmen shyǵarmashylyq kelisim jasaýda.
Al ótken jyly uıymdastyrylǵan 178 sharanyń basym bóligi pandemııaǵa baılanysty onlaın formatta boldy. Oblysta tuńǵysh ret Abaı Qunanbaıulynyń 175 jyldyq mereıtoıyna oraı «Abaı» operasy sahnalandy. Byltyrǵy jylǵy taǵy bir jańalyq – fılarmonııa janynan qobyzshylar ansambli quryldy. Klassıkalyq oryndaýshy Symbat Tasbergenova KSRO halyq artısi N.Tilendıevtiń 95 jyldyǵyna arnalǵan «Álqıssa» festıvalinen, «Aqmeshit» folklorlyq ansambliniń múshesi, dombyrashy Almas Áljanov M.Sydyqovtyń 80 jasqa tolýyna arnalǵan «Dombyra-júrek jyrlaıdy» atty respýblıkalyq onlaın-kúıshiler konkýrsynan júldeli oryndardy ıelendi.