2 aqpandaǵy úkimet otyrysynda Ekologııa mınıstri Maǵzum Myrzaǵalıev óz vedomstvasy ázirlegen Sý resýrstaryn basqarý jónindegi Memlekettik baǵdarlamanyń jobasyn tanystyrdy, dep habarlaıdy Egemen.kz.
"Búginde atalǵan memlekettik baǵdarlamany ulttyq jobaǵa aınaldyrý jumystary júrgizilýde. Onyń alty negizgi baǵyt anyqtaldy", - dedi mınıstr.
Birinshisi, sý dıplomatııasyn nyǵaıtý úshin memleketaralyq sý qatynastaryn jetildirý.
Ekinshisi, sý resýrstaryn sıfrlandyrý,esepke alý jáne monıtorıngileý. Nátıjesinde júz on toǵyz (119) sý arnasynda sıfrlandyrý jumystary júrgiziledi. Sonymen qatar, ózen aǵynynyń resýrstaryn aıqyndaýdyń aqparattyq júıesi qurylady jáne t. b.
Úshinshisi, sýdy únemdeý.Nátıjesinde zamanaýı sý únemdegish tehnologııalar qoldanylatyn sýarmaly jerdiń kólemi eki júz jıyrma bir (221) myń gektardan tórt júz jıyrma myń (420) gektarǵa deıin ulǵaıady.
Tórtinshisi, ırrıgasııalyq júıeler men qurylystardy qalpyna keltirý, jańa sý qoımalaryn salý. Nátıjesinde shamamen eki myń (2000) kılometr magıstraldyq arnalar rekonstrýksııalanady. Odan bólek jalpy kólemi segiz júz seksen bes mıllıon tekshe metr (885 mln. m3) bolatyn Jambyl (3), Batys-Qazaqstan(2), Túrkistan (1), Almaty (1) jáne Qyzylorda oblystarynda segiz (8) jańa sý qoımasy salynady. Al 2025-2030 jyldar ishinde taǵy otyz bir (31) sý qoımasy salynatyn bolady.
Besinshisi, quqyqtyq bazany jańartý. Osy jumystyń aıasynda jańa redaksııadaǵy Sý kodeksi ázirlenedi.
Altynshysy, sý salasynyń mamandaryn qazirgi zamanǵy daǵdylarmen daıarlaý jáne ǵylymı qamtamasyz etý.
Maǵzum Myrzaǵalıev "Jasyl Qazaqstan" ulttyq jobasyna da toqtalyp ótti.
"Jasyl Qazaqstan" ulttyq jobasy jeti negizgi bólimnen turady: sý nysandaryn saýyqtyrý, aýanyń lastaný deńgeıin tómendetý, qaldyqtardy basqarý, bıoalýantúrlilikti saqtaý, eldi kógaldandyrý, energııa tıimdiligi, ekologııalyq bilim jáne ekologııalyq mádenıetti arttyrý. Bul aýanyń lastaný deńgeıi joǵary 10 qala - Temirtaý, Nur-Sultan, Almaty, Aqtóbe, Atyraý, О́skemen, Qaraǵandy, Balqash, Jezqazǵan, Shymkent qalalaryndaǵy jaǵdaıdy jaqsartýǵa múmkindik beredi. Budan basqa, 2025 jylǵa qaraı sarqyndy sýlardy aǵyzý kólemin tómendetýge qol jetkizýdi, qaldyqtardy qaıta óńdeý úlesin aǵymdaǵy on segiz paıyzdan (18%) otyz bes paıyzǵa (35%) deıin arttyrýdy, sondaı-aq eldiń jalpy ishki óniminiń(VVP) energııa syıymdylyǵyn azaıtýdy josparlap otyrmyz", - deıdi ol.
Eki ulttyq jobany ázirleý jáne bekitý jumystary aǵymdaǵy jyldyń birinshi (1) shildesine qaraı aıaqtalady.
Orman qoryndaeki (2) mlrd. aǵash otyrǵyzý boıynsha júrgiziletin jumystardyń tıimdiligi barysyna qoǵamdyq monıtorıngti júzege asyrý maqsatynda, Ekologııa mınıstrliginiń qoldanystaǵy geoportalynyń negizinde ınteraktıvti karta qurý usynylady.
Qazir osy geoportalda orman órtteri men zańsyz aǵash kesý monıtorıngi onlaın rejımde júzege asyrylýda. Geoportal «Ǵarysh Sapary» kompanııasymen birlesip pysyqtalatyn bolady.
Kartada jyldar boıynsha óńir-óńirge bólingen aǵash otyrǵyzý josparlary kórsetiledi.