Aýyl sharýashylyǵy mınıstri Saparhan Omarov Úkimette Memleket basshysynyń 2021 jylǵy 26 qańtarda Úkimettiń keńeıtilgen otyrysynda bergen tapsyrmalaryn iske asyrý jónindegi sharalar týraly habardar etti, jazady Egemen.kz.
Aldymen mınıstr AО́K damytý jónindegi ulttyq jobanyń tujyrymdamasyn ázirleý barysy týraly baıandady. Aıtýynsha, búginde qujat agrobıznes, ǵylym ókilderimen jáne basqa da múddeli taraptarmen belsendi talqylanýda.
Aqpannyń birinshi onkúndiginde QR AShM tujyrymdamany «Atameken» UKP alańynda tanystyrmaq, eger qujatty barlyq múddeli taraptar maquldaǵan jaǵdaıda, Memlekettik josparlaý júıesiniń talaptaryna sáıkes ony Parlament depýtattarynyń, memlekettik organdar, oblys ákimdikteri men agrobıznes ókilderiniń qatysýymen Úkimette qaraýdy josparlap otyr.
«Ulttyq jobanyń negizgi qaǵıdattary - bıznes úshin mindettemelerdi engize otyryp, memlekettik qoldaý sharalarynyń sabaqtastyǵy men turaqtylyǵy bolady. Ulttyq jobany iske asyrýdaǵy negizgi úles óńirlerge tıesili ekenin eskere otyryp, oblys ákimderi osy qujatty daıyndaýǵa, onyń ishinde sharalardy ázirleýge jáne ındıkatıvter qoıýǵa belsendi qatysýy qajet», - dedi Saparhan Omarov.
Tujyrymdamany talqylaý qorytyndylary boıynsha ulttyq joba ázirlenetin bolady. Memleket basshysynyń tapsyrmasyna sáıkes ony qabyldaý merzimi 2021 jylǵy shildege belgilengen.
Sondaı-aq, ulttyq jobany maýsym aıynan keshiktirmeı Qazaqstan Respýblıkasy Prezıdentiniń janyndaǵy reformalar jónindegi Joǵary Keńeste qaraý josparlanýda.
Paıdalanylmaıtyn jaıylymdyq jerlerdi qaıtarý boıynsha tapsyrmaǵa qatysty AShM basshysy 2019 jyldyń sońynda kosmomonıtorıngti qoldanýdyń zańnamalyq bazasy qalyptastyrylǵanyn, al 2020 jyldyń basynda paıdalanylmaıtyn aýyl sharýashylyǵy jerlerin anyqtaý boıynsha pılottyq joba elimizdiń 4 oblysynda (Aqmola, Shyǵys Qazaqstan, Qostanaı jáne Mańǵystaý oblystary) iske qosylǵanyn atap ótti.
Nátıjesinde paıdalanylmaı jatqan 8,3 mln gektar jer anyqtaldy, onyń 7,6 mln gektary jaıylymdyq jerler.
«Atalǵan oblystardyń ákimdikteri paıdalanylmaıtyn jerlerdi memleket menshigine qaıtarýdy jedeldetip, olardy aýyl sharýashylyǵy aınalymyna tartýdy qamtamasyz etýi qajet. Búginde anyqtalǵan 7,6 mln gektar jaıylymnyń 2,6 mln gektary memlekettik menshigine jer ıeleri óz erkimen qaıtardy, 1,6 mln gektary aýyl sharýashylyǵy aınalymyna tartyldy. Al 3,4 mln. gektar jer boıynsha jergilikti atqarýshy organdar sot organdarynda materıaldar daıyndaýda», - dedi S.Omarov.
Saparhan Omarovtyń aıtýynsha, aǵymdaǵy jyldyń qańtarynan bastap kosmomonıtorıng respýblıkanyń barlyq aýmaǵynda júzege asyrylýda.
Sonymen qatar, Memleket basshysynyń tapsyrmasy boıynsha ótken jyly Salyq kodeksine paıdalanylmaıtyn jerlerge 10 eseden 20 esege deıin salyq mólsherlemelerin arttyrý engizildi. Bul paıdalanylmaıtyn aýyl sharýashylyǵy jerlerinen óz erkimen bas tartýǵa ekonomıkalyq turǵyda áser etý úshin jasalýda.
Sondaı-aq, paıdalanylmaıtyn aýyl sharýashylyǵy jerlerin qaıtarý merzimderin 2 jyldan 1 jylǵa deıin qysqartý, olardy kosmomonıtorıng derekteri negizinde sot tártibimen qaıtarý, habarlamany qaǵaz júzinde emes elektrondyq SMS-habarlama arqyly tapsyrýǵa kóshirý boıynsha zań jobasy ázirlenip, qazirgi ýaqytta Úkimetpen pysyqtalýda.
«Búginde Jerdi memleket menshigine qaıtarý tetikteri bar. Memleket basshysynyń tapsyrmasyn oryndaý úshin jergilikti atqarýshy organdar olardy barynsha paıdalaný sharalaryn qabyldaýy qajet», - dep tolyqtyrdy mınıstr.
2021 jylǵy qarashaǵa deıin Jer komıssııasyn qurý jáne jer kodeksine túzetýlerdi qabyldaýdy qamtamasyz etý týraly tapsyrmaǵa qatysty QR Aýyl sharýashylyǵy mınıstri Jer máseleleri jónindegi arnaıy komıssııany qurý jónindegi jumys bastalǵanyn baıandady.
Onyń quramyna barlyq múddeli taraptar, QR Parlamenti depýtattary, agrobıznes, fermerler odaǵy men qaýymdastyqtarynyń, «Atameken» UKP, oblys ákimdikteriniń jáne t. b. uıymdardyń ókilderi kiredi.
«Jer komıssııasy jumysynyń qorytyndysy jáne usynylǵan pikirlerdi talqylaý boıynsha jańa zań jobasynyń negizin quraıtyn aýyl sharýashylyǵy maqsatyndaǵy jerlerdi aınalymǵa engizý boıynsha biryńǵaı tujyrymdamalyq ádistemeler ázirlenetin bolady. Ony ázirleý Úkimettiń 2021 jylǵa arnalǵan zań jobalaý jumystary josparynda qarastyrylǵan», - dep atap ótti Saparhan Omarov.