Premer-Mınıstri Asqar Mamınniń tóraǵalyǵymen ótken Úkimet otyrysynda QR Prezıdenti Qasym-Jomart Toqaevtyń aǵymdaǵy jylǵy 26 qańtarda ótken keńeıtilgen Úkimet otyrysynda bergen tapsyrmalaryn oryndaý jónindegi sharalar qaraldy. Ishki jáne syrtqy saýdany damytý boıynsha tapsyrmalardy iske asyrý týraly Saýda jáne ıntegrasııa mınıstri Baqyt Sultanov baıandady, dep habarlaıdy Egemen.kz.
Birinshi, aǵymdaǵy jyly bes jyldyq ótpeli kezeńniń aıaqtalýyna baılanysty jer qoınaýyn paıdalanýshylardyń qazaqstandyq taýarlardy satyp alý mindettemesi joıyldy.
О́ndirýshilerdi qoldaý retinde jer qoınaýyn paıdalanýshylardyń jergilikti taýarlardy satyp alý boıynsha Erikti kelisimder jasasý tetigi engiziletin bolady.
«Bul rette, jer qoınaýyn paıdalanýshylar satyp alý qyzmetin ózderi derbes retteı alady. Tıisti zańdy túzetýler Parlament Májilisiniń qaralýynda», — dedi B. Sultanov.
Sonymen qatar, jer qoınaýyn paıdalanýshylardyń satyp alýyna qatysý úshin taýar óndirýshiler men adal jetkizýshilerdiń tizilimin bekitý jáne satyp alý prosesterinde ulttyq standarttardy qoldaný boıynsha qosymsha qoldaý sharalary pysyqtalyp jatyr.
Ekinshi, «Ortalyq Azııa» halyqaralyq saýda-ekonomıkalyq ortalyǵy jobasyn iske asyrý maqsatynda ózbek tarapymen onyń ornalasatyn jeri kelisildi.
«Biz jer telimin bólip, ınvestormen kelissózder júrgizýdemiz. Alaıda, ózbek tarapynyń pozısııasy ózgerýine baılanysty jobany iske asyrý prosesi keshiktirilip jatyr. Osyǵan oraı biz jobany iske asyrýdyń qosymsha nusqalaryn qarastyrýdamyz. Jalpy, bul Ortalyq О́zbekstanmen shekaralyq saýdany ulǵaıtýǵa yqpal etedi», — dedi B. Sultanov.
Úshinshi, áleýmettik mańyzy bar azyq-túlik taýarlary baǵalaryn tıimdi qalyptastyrý mınıstrliktiń turaqty baqylaýynda. Mınıstrdiń aıtýynsha, ótken jylǵy 11%-dyq ósim ımportqa táýeldi jáne eksportqa baǵdarlanǵan negizgi 5 taýarǵa baılanysty boldy, olardyń úlesi 8,9% qurady. Baǵany túbegeıli turaqtandyrý úshin mınıstrlik birqatar keshendi sharalardy usynady:
Birinshiden, ákimdikter bul máseleni qatań baqylaýda ustaýy qajet.
Ekinshiden, aýyl sharýashylyǵy taýarlarynyń óndirisin ulǵaıtý qajet.
Úshinshiden, saýdany sıfrlandyrýmen qatar, Ulttyq taýar ótkizý júıesin iske asyrý kerek. Jalpy, 24 kóterme-taratý ortalyǵy salynady. Onyń ishinde 2022 jyly Nur-Sultan, Shymkent, Almaty qalalarynda, jáne Almaty, Jambyl, Pavlodar oblystarynda 7 kóterme-taratý ortalyǵy iske qosylady. Sonymen birge V2V platformasy engizilip, áleýmettik ámııanmen ıntegrasııalanatyn bolady.
Tórtinshi, shekaradaǵy zańsyz saýda aınalymyna qarsy is-qımyl aıasynda:
tehnıkalyq retteý júıesin sıfrlandyrý;
«Sáıkestikti baǵalaý týraly» jańa zańdy ázirleý;
shekaralyq synaq zerthanalaryn qurý;
tańbalaýǵa arnalǵan taýarlar tizimin keńeıtý usynylady.