Premer-Mınıstr Asqar Mamınniń tóraǵalyǵymen ótken Úkimet otyrysynda QR Prezıdenti Qasym-Jomart Toqaevtyń bıyl 26 qańtarda ótken Úkimettiń keńeıtilgen otyrysynda bergen tapsyrmalaryn oryndaý jónindegi sharalar qaraldy. Bıýdjet shyǵystaryn ońtaılandyrý jáne salyqtyq-kedendik ákimshilendirýdi jaqsartý jónindegi sharalardy kúsheıtý týraly Qarjy mınıstri Erulan Jamaýbaev baıandady, dep habarlaıdy Egemen.kz.
Qarjy mınıstrligi bıýdjet shyǵystaryn ońtaılandyrý maqsatynda:
respýblıkalyq jáne jergilikti bıýdjetterdiń shyǵystaryn ońtaılandyrýdyń ádistemelik negizi ázirleıdi;
memlekettik josparlaýdyń aqparattyq júıesine «Satyp alýdyń biryńǵaı terezesi» servısi qosylady;
memlekettik organdardy avtokólikpen qamtamasyz etýdiń jańa nusqasy ázirleıdi;
daǵdarysqa qarsy jumsalatyn qarajat tıimdiliginiń monıtorıngi men baqylaýdy kúsheıtedi;
memlekettik qoldaý sharalarynyń tıimdiligine taldaý júrgizedi.
E. Jamaýbaev atap ótkendeı, bul rette aǵymdaǵy jyldyń 1 naýryzyna deıingi merzimde memlekettik jáne salalyq baǵdarlamalardyń kórsetkishteri men nysanaly ındıkatorlary bóliginde Memlekettik qoldaý sharalarynyń tıimdiligin monıtorıngteý ádistemesine usynystar engizý jáne aı saıyn Qarjy mınıstrligine memlekettik qoldaý sharalaryn iske asyrý jónindegi tıisti aqparat berýdi qamtamasyz etý qajet.
«Osy sharalardyń barlyǵy Memleket basshysynyń tapsyrmalaryn jáne jańa bastamalardy qarjylandyrý úshin qosymsha resýrstardy anyqtaýǵa, sondaı-aq bıýdjettik josparlaýdyń sapasyn arttyrýǵa múmkindik beredi», — dedi mınıstr.
Salyqtyq-kedendik ákimshilendirýdi jetildirýge qatysty, Memleket basshysynyń tapsyrmasyna sáıkes Eńbek jáne halyqty áleýmettik qorǵaý mınıstrligimen ashylǵan jumys oryndary jáne jumysqa ornalastyrylǵan azamattar týraly málimetterdi elektrondyq túrde qabyldaý qamtamasyz etiledi.
«Jaqynda bıýdjetten, onyń ishinde Jumyspen qamtý jol kartasy sheńberinde qarjylandyrylǵan memlekettik baǵdarlamalardyń qatysýshylaryn qashyqtyqtan baqylaý jáne taldaý júrgizildi. Salyqtyq ákimshilendirýdi ońaılatý jáne jeńildetý boıynsha keshendi sharalar qabyldanýda. Olar taýarlardy baqylaý júıesin, taýarlarǵa ilespe júkqujattar men elektrondyq plombalardy engizýdi qamtıdy. Bul kontragentter arasyndaǵy iske asyrýdyń ashyqtyǵyn qamtamasyz etedi», — dedi mınıstr.
Budan basqa, qosylǵan qun salyǵyn ákimshilendirýde Blockchain-tehnologııasyn engizý josparlanýda, bul salyq tóleýden jaltarý táýekelin aıtarlyqtaı tómendetedi jáne qolma-qol aqsha alý jónindegi mámilelerdi qysqartady. Qashyqtan ózara árekettesýge negizdelgen iri bıznestiń kóldeneń monıtorıngi boıynsha pılottyq joba bastaldy. Sonymen qatar, jeke tulǵalardyń múlki men jerine salynatyn salyqtar biriktirildi. Kóp páterli turǵynúılerdiń menshik ıeleri úshin jer salyǵy alynyp tastaldy.
Sonymen qatar, jeke tulǵalardyń menshigine salyq tóleý yńǵaıly bolý úshin «E-Salyq Azamat» mobıldik qosymshasy ázirlendi. Atap aıtqanda, POS-termınal men onlaın-baqylaý kassalyq mashınasyn qoldanatyn jeke kásipkerlerdiń salyq eseptiligin usynýdan bosatý bóliginde «E-Salyq-business» qosymshasy ázirlenýde.
«Jalpy alǵanda, jeke kásipkerlerdi tirkeý men jabýdy, salyq eseptiligin tapsyrýdy ońaılatý, bank komıssııasyn jáne fıskaldyq derekter operatorlarynyń qyzmetterine aqy tóleýdi alyp tastaý kózdeledi», — dedi E. Jamaýbaev.
Offshorlyq ıýrısdıksııalarǵa tranzaksııalar boıynsha offshorlyq alymdy engizýdi qamtamasyz etý úshin ýákiletti organmen birlesip zańnamaǵa qajetti túzetýler pysyqtalýda.
«Osy jyldyń 1 qyrkúıegine deıin memleket shekarasyndaǵy zańsyz saýda aınalymyna qarsy kedendik ákimshilendirýdi jaqsartýdy kózdeıtin Keshendi baǵdarlama ázirlenetin bolady», — dedi mınıstr.
Sonymen qatar, búgingi tańda 100% elektrondy kedendik deklarasııalaý júzege asyryldy. «Biryńǵaı tereze» jáne «ASTANA-1» AJ-i engizildi, Táýekelderdi basqarý júıesin paıdalaný bastaldy.
«QHR-men taýarlardyń eksporttyq deklarasııalarynyń málimetterin onlaın rejımde almasý júrgizilýde. Osyǵan uqsas jumystar basqa eldermen de júrgiziletin bolady. Arnaıy zaım sheńberinde 9 avto jáne 1 t/j ótkizý pýnktin jańǵyrtý josparlanýda», — dep túıindedi qarjy mınıstri.