Atyraýda kásipkerler meıramhanalar men dámhanalardyń jumys ýaqytyn ózgertýdi qalap otyr. Al oblystyń bas sanıtarlyq dárigeri bul másele jóninde ne deıdi?
О́ńirde 700-ge jýyq qoǵamdyq tamaqtandyrý orny bar. Olardyń 400-den astamy Atyraý qalasynda, 300-ge jýyǵy aýdandarda tirkelgen. Qazir meıramhanalar men dámhanalar keshki saǵat 20:00-ge jumys isteıdi. Bul – oblystyń bas sanıtar dárigeriniń talaby.
Atyraý oblysynyń kásipkerler men jumys berýshiler odaǵynda qoǵamdyq tamaqtandyrý oryndarynyń jumys isteý ýaqytyna qatysty másele qaraldy. Jıynǵa meıramhanalar men dámhanalardyń ıeleri, sondaı-aq Atyraý qalasy men oblysynyń bas sanıtarlyq dárigerleri qatysty. Kásipkerlerdiń suraıtyny – jumys ýaqytyn saǵat 20:00-den 00:00-ge deıin uzartý.
«Atyraý oblysynyń bas sanıtarlyq dárigeriniń sońǵy qaýlysyna sáıkes meıramhanalar men dámhanalardyń jumysyna saǵat 20:00-ge deıin ǵana ruqsat etilgen. Alaıda klıentter keshki saǵat 20:00-den 22:00-ge deıin kóp keledi. Bul – qyzmetkerler shtatyn ustaý, kommýnaldyq tólemderdi men nesıelerdi tóleý, basqa da operasııalyq shyǵystardy jabý úshin aqsha taba alatyn ýaqyt» deıdi kásipker Nurlan Muqyshev.
Kásipkerler jumys ýaqytyn shekteý shyǵynǵa ushyratqanyn alǵa tartady. О́ıtkeni tabystyń 90%-ǵa jýyǵy juma kúni keshte jáne demalys kúnderi túsedi eken.
«Demalys kúnderi meıramhanalar men dámhanalar bir saǵatta aılyq taýar aınalymynyń 20%-yn tabady. Sol sebepten, jeke turǵan meıramhanalar men dámhanalarǵa bir adamǵa 5 sharshy metr jaǵdaıda saǵat 00:00-ge deıin jumys isteýge ruqsat berýdi suraımyz» deıdi QR qoǵamdyq tamaqtaný qaýymdastyǵynyń keńesshisi Veronıka Nurpeıisova.
Osyǵan oraı oblystyń bas sanıtarlyq dárigeri Mádenıet Tanaýov bul máseleni eki táýlik ishinde qaraýǵa ýáde berip otyr.
«Eger bir aptada aımaqtaǵy epıdemıologııalyq jaǵdaı nasharlamaı, «sary» aımaqta qalý jalǵassa, biz meıramhanalar men dámhanalardyń jumys ýaqytyn saǵat 00:00-ge deıin uzartý múmkindigin qarastyramyz» deıdi Mádenıet Tanaýov.