Elordada 2 myń adamnyń qatysýymen utys oıynyn ótkizgen kásipkerler qala turǵyndarynan keshirim surady, dep habarlaıdy Egemen.kz
Esterińizge sala keteıik, 7 aqpanda qalada eki myń adamnyń qatysýymen jappaı is-shara ótkizýdiń joly kesildi. Jańa fılıaldyń ashylýyna oraı «Romantic» gúlder ortalyǵy lotereıa utys oıynyn ótkizgen bolatyn. Jappaı is-shara Máńgilik el dańǵylynda uıymdastyryldy.
Nátıjesinde, adam kóp jınalǵandyqtan keptelis paıda boldy. Al qatysýshylar maska rejımin, áleýmettik qashyqtyqty saqtamaı, vırýstyń taralý qaýpin arttyrdy.
Buqaralyq is-sharany ótkizgen uıymdastyrýshylar qala turǵyndarynan beıneótinish túrinde keltirilgen zalal úshin keshirim surady.
«Romantic» gúlder ortalyǵy Nur-Sultan qalasynyń turǵyndarynan keshirim suraıdy. Bolǵan oqıǵa úshin barlyq jaýapkershilikti óz moınymyzǵa alamyz. Is-sharalardy ótkizý úshin qoıylatyn talaptar men bas sanıtarlyq dárigerdiń nusqamasy buzyldy. Qalamyzǵa jáne jurtshylyqqa keltirilgen qolaısyzdyqtar úshin jaýapkershilikti kóterýge daıynbyz. Bul is-shara ákimdiktiń jáne basqa da memlekettik organdardyń kelisiminsiz ótkizildi. Qala turǵyndary aldynda keshirim suraımyz. Biz qalyptasqan jaǵdaıdyń aýyrlyǵyn túsinbedik», dedi qala turǵyndaryna gúl ortalyǵynyń atqarýshy dırektory Temirlan Kenjebaev.
Dúken ıeleri QR ÁQBtK-niń 425-babynyń birinshi bóligi boıynsha ákimshilik jaýapkershilikke tartyldy, olarǵa 230 AEK nemese 670 910 teńge mólsherinde aıyppul salyndy. Kásipkerler kinásin moıyndap, aıyppuldy 7 kún ishinde óteýge keliskendikten, tólem mólsheri 115 AEK nemese 335 455 teńgeni quraıdy.
7 aqpanda jumys rejımin buzǵany úshin «Zarechnyı» monshasy, «Opus One» karaoke-meıramhanasy jáne Time to smoke laýndj bary da jaýapkershilikke tartyldy.