О́tken senbi, jeksenbi kúnderi, ıaǵnı eki kún qatarynan Astana qalasynda Shyǵys Qazaqstan oblysynyń aýyl sharýashylyǵy taǵam ónimderiniń jármeńkesi bolyp ótti.
О́tken senbi, jeksenbi kúnderi, ıaǵnı eki kún qatarynan Astana qalasynda Shyǵys Qazaqstan oblysynyń aýyl sharýashylyǵy taǵam ónimderiniń jármeńkesi bolyp ótti.
Osy jármeńke bolady degen habardy kúni buryn estigen biz senbi kúni tańǵy saǵat toǵyz jarymda Astana qalasy ákimdiginiń aldyndaǵy saılanǵan orynǵa kelgenimizde qaz-qatar tizilgen sórelerde samsaǵan taýarlardy, saýdanyń qyzyǵyna berilip ketken halyqty kórip, birshama tańdanyp qaldyq. О́ıtkeni, dál osy kúni Astanany aıaz kernep turǵan bolatyn. Onyń ústine ádettegi saýda oryndarynyń tańǵy saǵat onnan keıin baryp, qımyl-qozǵalysqa kele bastaıtyndyǵy bar. Demek, shyǵysqazaqstandyqtardyń jármeńkesi ótetindigin astanalyqtar da biz sekildi kúni buryn bilip, aıazǵa qaramastan, ákimdik aldyndaǵy alańǵa erterek jınalǵan. Mine, osyǵan qarap-aq shyǵysqazaqstandyq aýylsharýashylyq qurylymdarynyń sapaly ónimderiniń el ishinde brendke aınala bastaǵandyǵyn baıqaýǵa bolady.
Biz tilshi retinde óz jumysymyzdy osy jármeńkeni uıymdastyrýshylarmen jolyǵýdan bastadyq. Mundaǵy sharýanyń basynda Shyǵys Qazaqstan oblysy aýyl sharýashylyǵy basqarmasynyń basshysy Dúısenbaı Selıhanov júr eken.
– Eger sál shydasańyzdar osy jerge oblysymyzdyń ákimi Berdibek Saparbaevtyń ózi de keledi. Bul jármeńke sol kisiniń bastamashyldyǵymen uıymdastyrylý ústinde. Demek, negizgi áńgimeni de sol kisiniń aýzynan estigenderińiz jón bolar. Al, bizdi astanalyqtar jaman qabyldap jatqan joq. Kúnniń aıazyna qaramastan, mine, kórip otyrsyzdar tańerteńnen bastap-aq saýdamyz qyza bastady, – dedi Dúısekeń.
Bıyl eginshilikten joǵary ónimge qol jetkizip, 1 mıllıon tonna astyq jınaǵan shyǵysqazaqstandyq sharýalar kóńildi eken. Osy jármeńkeniń ózine júzden astam qojalyq ónimderin ákelipti.
Biz osy jerden ózimizge qajetti málimetterdiń birazyn aldyq. Shyǵys Qazaqstan oblysy aýyl sharýashylyǵy basqarmasynyń tamaq jáne qaıta óńdeý bóliminiń basshysy Jánııa Muhamedqalıevanyń aıtýynsha, shyǵysqazaqstandyqtar jármeńkege 57 tonna et, 31 tonna bal, 12,5 tonna ósimdik maıyn, 6,5 tonna shujyq ónimderin, 6,2 tonna qymyz, 3,6 tonna sary maı men irimshik, 6,2 tonna jarma, burshaq, qaraqumyq ónimderin, 2 tonna qus etin, 3,7 tonna balyq ónimderin, sondaı-aq, buǵydan alynatyn emdik qasıeti kúshti panty ónimderin ákelipti. Bul ónimderdiń baǵasy Astana bazarlaryndaǵydan 20 paıyzdaı arzan eken. Ári sapasy da kóńildegideı. Sondyqtan bolar aıazǵa qaramastan saýda jasaýshy astanalyqtar kóńildi.
– Shyǵysqazaqstandyq sharýalar bıylǵy jyly osymen ekinshi ret Astanaǵa óz ónimderin ákelip saýdalap otyr. Olardyń baǵalary arzan. Sondyqtan osy jármeńkede biraz azyq-túlik ónimderin satyp aldyq. Osy isti uıymdastyrǵan Shyǵys Qazaqstan oblysy men Astana qalasy ákimdikterine erekshe rızashylyǵymyzdy bildiremiz, – deıdi qala turǵyny Raıhan Áshimbaeva.
Jármeńkeden et, bal ónimderin satyp alǵan Danaǵat Muratbekuly da mundaǵy baǵanyń arzandyǵyna óz rızashylyǵyn jetkizdi.
Rasynda da, jármeńkeni aralap kórgen kezimizde bul jerde sıyr etiniń kılogramyn 800 teńgege, balyqty 200 teńgege, dúnıe júzine ataǵy shyqqan Altaı balynyń kılogramyn bar bolǵany 800-900 teńgege satyp alýǵa bolatyndyǵyna kóz jetkizip, rıza bolyp qaldyq. Onyń ústine bul jármeńkede bylaıǵy halyqqa tańsyq, tek Shyǵys Qazaqstan jerinde ǵana óndiriletin ónimder de barshylyq eken. Máselen, buǵy múıizinen jasalynatyn panty ónimderimen qatar, maral eti de saýdalanýda. Sondaı-aq, jármeńkege shyǵysqazaqstandyqtardyń qolónerlik buıymdary da qoıylypty.
Birazdan keıin jármeńkege Astana qalasynyń ákimi Imanǵalı Tasmaǵambetov pen Shyǵys Qazaqstan oblysynyń ákimi Berdibek Saparbaev ta kelip, jármeńkeni aralap kórip, tilshilerge shaǵyn suhbat berdi.
– Astanada mundaı jármeńkeni uıymdastyrý eki jaqqa da birdeı tıimdi. Astanalyqtar shyǵystan kelgen arzan ónimderdi satyp alǵandyqtaryna rızashylyq tanytsa, ekinshiden, bizdiń shyǵysqazaqstandyq sharýalar óz ónimderin ótkizý múmkindigine ıe bolady. Demek, aýylsharýashylyq ónimderin jarnamalap ótkizýdiń ǵasyrlar qoınaýynan kele jatqan tıimdi tásili – jármeńke múmkindikterin paıdalana bilýimiz kerek, – dedi oblys ákimi.
Imanǵalı Tasmaǵambetov óz kezeginde Shyǵys Qazaqstan aýyl sharýashylyǵy taýarlaryn óndirýshilerge Astana turǵyndarynyń atynan alǵysyn bildirdi.
Rasynda da, oblys ákimi aıtqandaı, Astanada eki kún boıy ótken Shyǵys Qazaqstan oblysynyń aýylsharýashylyq ónimderiniń jármeńkesi bizge bereke bastaýyndaı bolyp kórindi. Osy arqyly óńirler bir-birine jaqyndaı túskendeı sezildi.
Suńǵat ÁLIPBAI,
«Egemen Qazaqstan».