Elordadaǵy Q. Qýanyshbaev atyndaǵy memlekettik akademııalyq qazaq mýzykalyq drama teatrynda jýrnalıst, dramatýrg Dýman Ramazannyń pesasy negizinde belgili rejısser Bolat Uzaqov sahnalaǵan «Abylaı hannyń armany» qoıylymy kórermen kózaıymyna aınaldy.
Elordadaǵy Q. Qýanyshbaev atyndaǵy memlekettik akademııalyq qazaq mýzykalyq drama teatrynda jýrnalıst, dramatýrg Dýman Ramazannyń pesasy negizinde belgili rejısser Bolat Uzaqov sahnalaǵan «Abylaı hannyń armany» qoıylymy kórermen kózaıymyna aınaldy.
Jas qalamger men tanymal rejısserdiń tarıhı týyndyny tańdaýda osymen ekinshi márte joldary toǵysyp otyr. Eske sala keter bolsaq, 2010 jyly shyǵarmashylyq dýettiń úndesýimen «Kenesary – Kúnimjan» tarıhı shyǵarmasy dúnıege kelgen bolatyn. El ishi ala taıdaı búlingen keshegi alasapyran zamandardyń qatparynda qalyp qoıǵan áli qanshama qazyna jatyr deseńshi. Tarıhtyń tereńinen marjan tergen saıyn buryn-sońdy kezikpegen talaı-talaı qundylyqtyń qundaǵy ashyla túsedi. Sonyń bir belesi alty Alashtyń balasynyń basyn qosqan Abylaı hannyń 300 jyldyq qurmetine elordalyq teatr sahnalaǵan týyndyda kórinis tabady.
Oqıǵa Abylaı hannyń jońǵar tutqynyna túsken kezinen bastalady. Munda negizinen batyr babanyń qazaq halqyn qıyn-qystaý kezeńnen alyp shyǵý jolyndaǵy janqııar batyldyǵy men kóregendigi baıandalady. Eger sol ýaqytta dál mundaı sarabdal da salıqaly kóshbasshy bolmaǵanda, qazaq halqy jońǵarlardyń kebin kıip, jer betinen ult retinde múlde joıylyp ketýi ábden múmkin edi. Sahnalyq týyndy negizinen Abylaıdyń kóshbasshylyq qasıetimen birge adamı bolmys-bitimin, qaıratkerligin, saıasatkerligin, erjúrek batyldyǵy men asqan aqyl-oı ıesi ekendigin ashyp kórsetýge kóbirek den qoıady. El bastaǵan kósemdigi men qol bastaǵan batyldyǵynyń arqasynda bar qazaqtyń basyn qosyp, el men jerdiń tutastyǵyn saqtap qalǵan Abylaı zamanynyń muraty áli de sol bıik kúıinde qala bermek. Spektakl osydan nesheme ǵasyr burynǵy oqıǵaǵa arnalǵanymen taqyryby kúni búginge deıin óte mańyzdy, sebebi, el birligin, ult teńdigin nasıhattaıdy. Al eldik pen birlikke úndeıtin shyǵarma eshqashan artyqtyq etpeıdi. Batyr babalarymyz ǵasyrlar boıy kóz qarashyǵyndaı saqtap kelgen ulan-baıtaq qazaq dalasynyń azattyǵy úshin aıqasqan tulǵalar týraly kez kelgen tarıhı týyndy biz úshin qymbat ta qyzyqty. Taǵy bir aıta keterligi, tarıhı qoıylymǵa teatrdyń beldi de jetekshi akterleri túgel qatysty deýge bolady. Mysaly, Abylaı beınesin «Daryn» memlekettik jastar syılyǵynyń laýreaty Syrym Qashqabaev somdasa, Qaldan Serendi QR eńbek sińirgen qaıratkeri Boranbaı Moldabaev, Jolbarys sultandy Jánibek Musaev, Topysh sulýdy Aqmaral Tanabaeva, Qazybek bıdi Amanjol Moldahmet, úsh júzdiń bılerin Qazaqstannyń halyq ártisi Tilektes Meıramov, Bolat Ybyraev, Ashat Sultan, knıaz Ivan Ýrakovty QR eńbek sińirgen qaıratkeri Keńes Nurlanov, Qytaı elshisi Na-Vangty Dastan Álimov somdady.
«Egemen-aqparat».
Sýretterdi túsirgen
Erlan OMAROV.