Qazaqstannyń qurmetti jýrnalısi, Qazaqstan jýrnalıster Odaǵynyń múshesi, KSRO televızııasy jáne radıosynyń úzdigi Jumaseıit Qoǵabaıuly Bıjan 80-nen asqan shaǵynda ómirden ótti, dep habarlaıdy Egemen.kz.
Ol 1940 jylǵy 24 aqpanda Pavlodar oblysy Aqtoǵaı aýdanynyń Shuǵa aýylynda týǵan. 1966 jyly Qaraǵandy pedagogıkalyq ınstıtýtyn qazaq tili men ádebıeti pániniń muǵalimi mamandyǵy boıynsha bitirgen. Eńbek jolyn óziniń týǵan aýylynda muǵalim bolyp bastaǵan.
Jurtshylyq ony belgili jýrnalıst, ustaz retinde jaqsy biledi. Ol ár jyldary Ekibastuz aýdandyq «Vpered-Alǵa» gazeti redaktorynyń orynbasary, Pavlodar oblystyq Teleradıo kompanııasynyń redaktory, bas redaktory, saıası sholýshysy, bas prodıýseri, tóraǵanyń orynbasary (1979-1997 jyldary), S.Toraıǵyrov atyndaǵy ýnıversıtetindegi «Bilik» gazetiniń redaktory bolyp qyzmet atqardy. Ýnıversıtettiń aǵa oqytýshysy, J.Aımaýytov atyndaǵy etnopedagogıka jáne ınnovasııalyq tehnologııalar ortalyǵynyń ǵylymı qyzmetkeri retinde bolashaq jýrnalısterdi daıarlaýǵa úlken úles qosty. Búginde onyń tálimin alǵan jýrnalıster respýblıkanyń túkpir-túkpirinde jemisti eńbek etýde.
Jumaseıit Bıjanuly «Zamandastar taǵylymy», «Ardaqty elim – Aqtoǵaı», «Dala ýalaıaty» gazeti (1888-1902 jyldary), «Oı tolqyny:tájirıbelik nusqaýlyq» kitaptarynyń, «Kózqaras», «Dáýir» sekildi teleradıo baǵdarlamalarynyń avtory.
Jumaseıit Bıjan Qazaqstan Jýrnalıster odaǵy syılyǵynyń, Keńes Odaǵy teledıdar jáne radıosynyń úzdigi belgisiniń ıegeri. «Qurmet» ordenimen (2018), «Mádenıet salasynyń úzdigi» tósbelgisimen, S.Toraıǵyrov atyndaǵy altyn medalmen (2010) marapattalǵan.