Qaraǵandy oblysynda balamaly energııa kózderin damytý qarqyndy baǵyt aldy. Mysaly, qazirgi tańda óńirdegi «jasyl» energetıkanyń qýattylyǵy 300 megavatqa jetti. Búginde oblysta tórt birdeı kún elektr stansasy qalypty jumys istep tur. Budan bólek taǵy da jańa nysandar salý josparda bar.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov jańǵyrmaly energııa kózderin damytý – keleshektegi mańyzdy mindetterdiń biri ekenin aıtty.
– Qazir Qaraǵandy oblysyndaǵy Saran qalasynda, Aqtoǵaı aýdanynyń Gúlshat aýylynda, Shet aýdanyndaǵy Aqadyr kentinde, Jezqazǵannyń janyndaǵy Keńgir eldi mekeninde jalpy qýaty 200 MVt bolatyn tórt kún elektr stansasy jumys istep tur. Sonymen qatar Abaı jáne Buqar jyraý aýdandarynda eki bıogaz stansasy jáne Yntymaq sý qoımasynda shaǵyn sý elektr stansasy qýat kózin óndiredi. Oblys boıynsha jańartylǵan jáne balamaly energııanyń jalpy qýaty 227,97 MVt quraıdy, – degen málimet berdi ol.
Qazirgi tańda sheteldik jáne otandyq ınvestorlar «jasyl» energetıkany damytýǵa múddeli. Mysaly, joǵaryda aıtylǵan tórt kún stansasy jobasyna ınvestorlar 102 mlrd teńge qarjy salǵan. Soǵan qaraǵanda bul jobalar ınvestor úshin ekonomıkalyq jaǵynan qaıtarymy asa tıimdi sharýa bolsa kerek.
Aldaǵy ýaqytta oblysta jańǵyrmaly energııa kózderiniń qýatyn arttyrý boıynsha aýqymdy jospar qarastyrylǵan. Mysaly, Balqash qalasynyń mańyndaǵy Qońyrat eldi mekenine jaqyn jerde qýaty 100 MVt bolatyn kún elektr stansasynyń qurylysy bıyl aıaqtalyp, iske qosylady degen boljam bar.
Sondaı-aq Saran qalasynda taǵy bir balamaly energııa kózin óndiretin nysan salynbaqshy. Bul – qýaty 100 MVt jáne odan joǵary jınaqtaýyshtary bar gıbrıdti kún elektr stansasynyń jobasyn cheh ınvestory júzege asyrýdy josparlaǵan. Aıta ketetin bir jaıt, jergilikti atqarýshy bıliktiń sheteldik ınvestorlarǵa qushaǵy ashyq. Mysaly, Sarandaǵy joba úshin kún elektr stansasyn salýǵa 18 ga jer telimi bólingen.