Nur-Sultanda jeńil atletıkadan jasóspirimder arasynda "Nur-Sultan Open 2021" qalalyq chempıonatynyń ashylý saltanaty ótti. Is-sharaǵa Nur-Sultan qalasynyń jeńil atletıka basshysy, elorda ákimi Altaı Kólginov, QR Mádenıet jáne sport mınıstri Aqtoty Raıymqulova, Olımpıada chempıony Serik Sápıev jáne jazǵy Olımpıada oıyndarynyń júldegeri, jeńil atlet Dmıtrıı Karpov qatysty, dep habarlaıdy Egemen.kz.
Bul - "Qazaqstan" jańa jeńil atletıka kesheniniń qabyrǵasynda ótip jatqan alǵashqy sporttyq is-shara. Jarysqa elimizdiń ár óńirinen sportshylar qatysty. Is-shara sanıtarlyq normalardy qatań saqtaı otyryp, jankúıersiz ótkizildi. Jarys baǵdarlamasynda ıadro laqtyrý, júgirý, estafeta, uzyndyqqa sekirý jáne jeńil atletıkalyq júrý sııaqty sport túrleri boldy.
«Elimizdegi sporttyq qalalardyń biri degen ataýdy elordamyz laıyqty ıelenip keledi! Qalamyzda óziniń sporttyq klasteri bar. Sonymen qatar, halyqaralyq talaptarǵa saı birqatar iri sport mekemeleri ashyldy. "Qazaqstan" jeńil atletıkalyq kesheni bizge halyqaralyq deńgeıdegi jarystar ótkizip qana qoımaı, zamanaýı sport juldyzdary men jattyqtyrýshylardy tárbıelep, jastarymyzdy bala kúninen sportpen shuǵyldanýyna múmkindik beredi.
Memleket basshysynyń tapsyrmasy boıynsha sport nysandarynyń qoljetimdiligin arttyrý jáne qala turǵyndaryn buqaralyq sportqa qyzyqtyrý boıynsha tıisti jumystar júrgizilip jatyr. Balalar men jasóspirimder sportyna, federasııalarǵa qoldaý kórsetemiz», - dedi Nur-Sultan qalasy jeńil atletıka federasııasynyń basshysy, elorda ákimi Altaı Kólginov.
Altaı Kólginov qalanyń sporttyq mekemeleri tek oıyn ótkizý jáne kásibı sportshylardyń jattyǵýy retinde ǵana emes, balalardyń da sportpen shuǵyldanýyna arnalǵan baza retinde paıdalanylatynyn atap ótti.
Qala chempıonatynda sportty dáripteýdiń jáne sport mekemeleri jelisin keńeıtýdiń mańyzdylyǵyn Mádenıet jáne sport mınıstri Aqtoty Raıymqulova da óz sózinde atap ótti.
Esterińizge sala keteıik, jańa jeńil atletıka kesheni ótken jyldyń kúzinde ashylǵan bolatyn. Bul oryn IAAF-tiń barlyq talabyna sáıkes keledi. Munda respýblıkalyq jáne halyqaralyq jarystar, sonyń ishinde álem chempıonattary men Olımpıada oıyndaryn ótkizýge múmkindik bar. Sport kesheninde júgirý joldary ornatylǵan atletıkalyq alań, trenajer zaly jáne ıadro laqtyrýǵa, bıiktikke, uzyndyqqa sekirýge arnalǵan sektorlary, balalar alańy, basseınder sekildi artyqshylyqtary bar. Manej 7000 kórermenge eseptelgen.
Jeńil atletıka kesheni Elbasynyń tapsyrmasy boıynsha "Samuryq-Qazyna" kompanııasynyń qarajaty esebinen salyndy.