Reseılik analıtıkalyq kredıttik reıtıng agenttiginiń (AKRA) jańartylǵan esebi boıynsha, Qazaqstannyń nesıe reıtıngindegi jaǵdaıy «teristen» «turaqtyǵa» aýysyp, VVV+ deńgeıine jetken, dep habarlaıdy Egemen.kz
Agenttiktiń habarlaýynsha, Qazaqstannyń «teristen» «turaqtyǵa» ózgerýi 2020 jylǵy syrtqy jáne ishki shoktardan týyndaǵan syn-qaýipterdiń álsireýimen baılanysty. 2020 jyly Qazaqstan ekonomıkasynyń ósý qarqyny -2,6 paıyzdy qurady, bul damyǵan elder tobymen (-5,4 paıyz) salystyrǵanda da, damýshy elder tobymen (-5 paıyz) salystyrǵanda da aıtarlyqtaı turaqty kórsetkish bolyp otyr. AKRA 2021 jyly ekonomıkalyq ósimniń 3,8 paıyzǵa deıin qalpyna kelýin boljaıdy.
«2021 jyly AKRA ınflıasııanyń nysanaly dáliz sheńberine qaıta oralýyn kútýde (4-6 paıyz). Bul ulttyq valıýtaǵa qysymnyń tómendeýine jáne 2020 jylǵy ınflıasııalyq soqqy áseriniń sarqylýyna baılanysty bolady. Byltyr teńgeniń AQSh dollaryna qatysty qunsyzdanýy orta eseppen 8 paıyzdy qurady jáne ol ótken daǵdarys kezinde tirkelgen deńgeıden edáýir tómen boldy (2016 jyly – 54 paıyz)» delingen zertteý habarlamasynda.
AKRA boljamynsha, memlekettik qaryzdyń turaqty jáne ortasha deńgeıi Qazaqstanǵa bolashaqta kontrsıkldi bıýdjettik saıasatty qoldanýǵa múmkindik beredi. AKRA atap ótkendeı, qoǵamdyq ınstıtýttar da, memlekettik ınstıtýttar da sońǵy ýaqytta oń ózgeristerdi baıqatyp otyr.
Oń áser etetin uzaq merzimdi taǵy bir faktor — adam kapıtalyn jaqsartý. Dúnıejúzilik banktiń 2020 jylǵa arnalǵan baǵalaýy boıynsha Qazaqstannyń adam kapıtalynyń ındeksi Ortalyq Azııa elderi boıynsha ortasha deńgeıden joǵary jáne salystyrylatyn elder tobynyń reıtıng sanaty boıynsha eń joǵarǵylardyń biri.
Eske salsaq, AKRA 2015 jyly qarasha aıynda Reseı Bankiniń sheshimimen qurylǵan.