Pandemııa qyspaqqa alǵan 2020 jyly elimizge birqatar memleketten gýmanıtarlyq kómek kelgeni belgili. Tipti, kelgen zattardyń «SQ Farmasııa» qoımasynda aılap jatyp qalyp, onyń sońy qoǵamdyq shýǵa ulasqanyn da el áli umyta qoıǵan joq. Qazaqstannyń ózi basqa elderge 3 mln dollar kóleminde gýmanıtarlyq kómek jibergen.
Qazaqstanǵa byltyr jalpy kólemi 19 mln dollardyń kómegi kelgen. Sonyń teń jartysy Qytaıǵa tıesili eken. QHR Qazaqstanǵa 10 mln dollar kóleminde kómek attandyrǵan. Negizi pandemııaǵa deıin, 2019 jyly Qytaıdan birde-bir gýmanıtarlyq kómek almappyz. Al 2019 jyly bizge kómek kórsetý boıynsha Germanııa kósh bastaǵan. Nemister kómek legin 2020 jyly da jalǵastyryp, 2,2 mln dollarǵa baǵalanatyn qajetti zattar jibergen. Degenmen bul kórsetkish 2019 jylmen salystyrǵanda 3,7 ese az. Odan keıingi oryndarda Úndistan jáne Katar elderi tur. Al AQSh-tyń bizge jibergen kómegi 3,1 mln dollarǵa baǵalanady. Bul 2019 jylmen salystyrǵanda 2,4 ese kóp.
Byltyr aqshalaı túrde alynǵan gýmanıtarlyq kómektiń basym bóligi mashına jáne jabdyqtaýǵa tıesili: 6,5 mln dollar (7,7 ese ósim). Sondaı-aq jalpy kólemniń 31 paıyzyn kıim men aıaq kıim quraǵan: 5,9 mln dollar (9 ese ósim). Bul oraıda medıkamentterden turatyn gýmanıtarlyq kómek 2,3 ese qysqaryp, 1,7 mln dollardy qurapty.