Bıyldan bastap jańa formatta ótkeli jatqan fýtboldan Qazaqstan Sýperkýbogynyń jerebesi tartyldy.
Elordada ótken jerebe tartý nátıjesi boıynsha, týrnırdiń jartylaı fınalyndaǵy alǵashqy oıyn 2 naýryzda byltyrǵy el chempıony – «Qaırat» pen kúmis júldeger Qostanaıdyń «Tobyly» arasynda ótedi. Al 3 naýryzǵa josparlanǵan ekinshi jartylaı matchta Qaraǵandynyń «Shahteri» elordanyń «Astana» klýbymen kim myqtyny anyqtaıdy. Al úshinshi oryn úshin ótetin match 5 naýryzda, fınaldyq kezdesý 6 naýryzda uıymdastyrylady. Sýperkýbok oıyndary jýyrda ǵana paıdalanýǵa berilgen Túrkistandaǵy «Túrkistan-Arenada» ótedi.
Aıta keteıik, týrnırdiń jalpy júlde qory 40 mln teńgeni quraıdy (shamamen, 94,7 myń dollar). Al jeńimpaz atanǵan klýbqa Qazaqstan Sýperkýbogy men 25 mln teńge (shamamen 59,2 myń dollar) tapsyrylady.