Kezdesý barysynda kómirsýtegi sektoryndaǵy birqatar jobany júzege asyrý máseleleri, Qazaqstan men Total konserni arasyndaǵy yqpaldastyqtyń aldaǵy perspektıvalary, sondaı-aq, jańa ınvestısııalar tartý múmkindikteri talqylandy, dep habarlaıdy Egemen.kz.
Arno Breııak Qasym-Jomart Toqaevqa konsernniń jasyl tehnologııalar baǵytyndaǵy jumysyn transformasııalaý jospary týraly aıtyp, kásiporynnyń ataýyn TotalEnergies dep ózgertýge nıetti ekenin jetkizdi.
Sonymen qatar fransýz kásipkeri konsernniń Qazaqstandaǵy munaı-gaz salasy boıynsha, sonyń ishinde, Qashaǵan ken ornyndaǵy ekinshi fazany iske asyrý aıasyndaǵy iri jobalarǵa, sondaı-aq, jańartylatyn energııa kózderi baǵytyndaǵy birqatar jobaǵa ınvestısııa salýǵa daıyn ekenin naqtylady.
Memleket basshysy munaı-gaz konserniniń damý strategııasyn ózgertý jónindegi sheshimin quptap, Qazaqstannyń 2060 jylǵa qaraı kómirtegi boıynsha beıtaraptyqqa qol jetkizýge beıildi ekenin aıtty.
Sonymen qatar kezdesýde Arno Breııak Qasym-Jomart Toqaevqa kompanııanyń Kaspıı jáne Ońtústik-Eýropa aımaǵy baǵytyndaǵy bólimshesiniń jańa vıse-prezıdenti Krıstın Heılıdi tanystyrdy.