Úkimet otyrysynda «KEGOC» AQ basqarma tóraǵasy Nábı Aıtjanov ótken kúzgi-qysqy kezeńniń qorytyndylary men aldaǵy jyldarǵa daıyndyq barysyn baıandap, saladaǵy negizgi kórsetkishterdi jarııa etti. Onyń aıtýynsha, eldiń elektr energetıkalyq júıesine túsetin júkteme jyldan-jylǵa ósip, tutyný men óndiris kólemi turaqty ulǵaıyp otyr, dep habarlaıdy Egemen.kz.
О́tken kúzgi-qysqy kezeńde Qazaqstannyń Birtutas elektr energetıkalyq júıesinde tutyný maksımýmy 2025 jylǵy 18 jeltoqsanda tirkelip, 17 724 MVt-ty qurady. Bul aldyńǵy 2024-2025 jyldardaǵy kezeńmen salystyrǵanda 3%-ǵa nemese 521 MVt-qa joǵary.
Jalpy, 2025 jyldyń qorytyndysy boıynsha elektr energııasyn tutyný kólemi de aıtarlyqtaı artqan. Atap aıtqanda, 2024 jylmen salystyrǵanda 4,6 mlrd kVtsaǵatqa nemese 3,8%-ǵa ósip, 124,6 mlrd kVtsaǵatqa jetti.
Elektr energııasyn óndirý kórsetkishi de oń dınamıka kórsetken. 2025 jyly óndiris kólemi 5,2 mlrd kVtsaǵatqa nemese 4,4%-ǵa artyp, 123,1 mlrd kVtsaǵatty qurady. Bul eldegi energııaǵa degen suranystyń artyp otyrǵanyn jáne generasııa múmkindikteriniń kezeń-kezeńimen kúsheıip kele jatqanyn ańǵartady.
Iri energetıkalyq nysandardan taraıtyn zııandy shyǵaryndylar 35 paıyzǵa azaıady
Aldaǵy kezeńge boljam da naqtylandy. Mamandardyń baǵalaýynsha, 2026-2027 jyldardaǵy kúzgi-qysqy kezeńde maksımaldy tutyný kólemi 18,2 GVt deńgeıine jetedi. Osy júktemeni eńserý úshin iri elektr stansalary naqty rejımde jumys isteýge tıis. Atap aıtqanda: – Ekibastuz GRES-1 – 8 blok; – Ekibastuz GRES-2 – 2 blok; – «EEK» AQ – 7 blok; – Jambyl GRES-i – 4 blok, onyń ishinde bir rezervtik blok turaqty daıyndyqta bolýy qajet.
Sonymen birge, turaqty energııamen qamtý úshin birqatar mańyzdy mindet aıqyndaldy. Josparlanǵan jańa qýattardy iske qosý, sonyń ishinde Túrkistan jáne Qyzylorda bý-gaz qondyrǵylary, Almaty JEO-2 men JEO-3 jańǵyrtý jobalary ýaqytyly aıaqtalýǵa tıis.
Budan bólek, negizgi generasııalaıtyn jáne elektr jelilik jabdyqtardy jóndeý jumystary júıelik operatormen kelisilgen merzimde tolyq oryndalýy qajet. Jylý elektr stansalarynda kómirdiń normatıvtik qory qamtamasyz etilip, gaz elektr stansalary úshin kógildir otynnyń úzdiksiz jetkizilýi de basty nazarda bolady.
Sondaı-aq, Jambyl GRES-in jetkilikti kólemde otynmen jáne salqyndatqysh sýmen qamtý máseleleri aldyn ala sheshilýi tıis. Bul aldaǵy maýsymda táýekelderdi azaıtyp, energetıkalyq júıeniń turaqty jumys isteýine múmkindik beredi.
Qazaqstanda 5 jylý elektr ortalyǵy «qyzyl» aımaqtan shyqty