Bul týraly Ekologııa, geologııa jáne tabıǵı resýrstar mınıstri Maǵzum Myrzaǵalıev atyraýlyq ÚEU ókilderimen, ekobelsendilermen kezdesýde málim etti.
Kezdesýde óńir ekologııasyn jaqsartýǵa baılanysty belgilengen josparlardy tıimdi iske asyrýdyń mańyzy talqyǵa tústi.
«Bizdi aımaqtaǵy ekologııalyq jaǵdaı alańdatady. Atyraý elimizdiń eń lastanǵan qalalarynyń qataryna kiredi. Árıne, bul jaǵdaıdy jaqsartý qajet. Bul mańyzdy jumysta belsendi azamattar tarapynan qoldaý, kómek qajet. Men qashanda syndarly dıalogqa ashyqpyn» dedi Maǵzum Myrzaǵalıev.
Mınıstrdiń málimetinshe, Atyraý oblysynyń ekologııalyq problemasyn sheshý úshin 40 is-sharadan turatyn Jol kartasy ázirlendi. Onda jańa kárizdik tazartý keshenderin salý, eskilerin qalpyna keltirý, «Sasyq saı» men «Sharshy» býlaný alańdaryn rekýltıvasııalaý, Jaıyq ózeniniń basseınin kógaldandyrý, tazartý, saýyqtyrý sekildi mańyzdy is-sharalar bar.
«Biz Atyraýdyń ekologtarymen, qoǵam ókilderimen birneshe ret kezdestik. Kezdesýlerimizdiń nátıjesi – Jol kartasyn qabyldaý. Jańa Ekologııalyq kodeks te osy baǵytta perspektıvaly múmkindikter ashatynyn atap ótkim keledi. Eń mańyzdysy, kodeks iri lastaýshy kásiporyndardyń áleýmettik jaýapkershiligin arttyrýǵa múmkindik beredi», - dedi mınıstr.
Onyń pikirine súıensek, qazir 1-sanatqa jatatyn kásiporyndar eń ozyq qoljetimdi tehnologııalardy engizýge daıyndyq sharalaryn bastady. Demek, bolashaqta atmosferaǵa lastaýshy zattardyń shyǵaryndylary aıtarlyqtaı azaıady.
Sondaı-aq, mınıstr Atyraýda óńirdiń ekologııalyq problemalaryn tirkeıtin front-ofıs ashýdy usyndy.