Aty ańyzǵa aınalǵan balýan Jaqsylyq Úshkempirov búgingi Baızaq aýdanynyń Dıhan aýylynda dúnıege kelgen. Shaǵyn aýyldan shyqqan sportshy osydan qyryq bir jyl buryn Máskeý Olımpıadasynda top jaryp, qazaq atyn álemge áıgiledi.
О́tken jyly dúnıeden ótken balýannyń esimi máńgi el esinde. Qarshadaı kezinen kúreske ómirin arnaǵan dańqty tulǵanyń rýhyn ulyqtaý maqsatynda týǵan jerinde birqatar jumys atqarylýda.
Jýyrda Baızaq aýdandyq tarıhı-ólketaný mýzeıinde Jaqsylyq Úshkempirov atyndaǵy burysh ashyldy. Munda kelýshiler balýan ómiriniń túrli kezeńderimen tanysa alady. «Jańadan ashylǵan arnaıy buryshqa áıgili balýannyń jeke zattary, fotosýretteri, kitaptary qoıylǵan. Jádigerlerdiń ishinde Jaqsylyq aǵamyzdyń alǵash jarystarǵa shyqqan kezde kıgen aqshyl-sur tústi kostıým-shalbary da bar. Sportshynyń osy jáne ózge de tutynǵan zattaryn erekshe qyzyǵýshylyqpen tamashalaıtyn mýzeıge kelýshi kópshilik jastar batyr jolyn jalǵastyrǵysy keletinin aıtady», deıdi mýzeıdiń qor saqtaýshysy Aıdana Shotbasova.
Búginde balýan týǵan óńirde Jaqsylyq Úshkempirov atyndaǵy sport mektebi bar. Atalǵan keshende san myńdaǵan ul-qyz sportpen shuǵyldanyp, bıik arenalarda elimizdiń atyn tanytyp júr. Balýannyń jolyn jalǵastyrýshy jastar úshin munda barlyq múmkindik qarastyrylǵan.
Jambyl oblysy