Almatyda «Eski úıler» baǵdarlamasy boıynsha jańa páter alýshylar qatary kóbeıip keledi
Almatyda «Eski úıler» baǵdarlamasy boıynsha jańa páter alýshylar qatary kóbeıip keledi
Oqyrmandar esinde bolsa, ótken jyly aqpan aıynda 2012-2015 jyldarǵa arnalǵan Almaty qalasynyń aýmaǵyndaǵy tozyǵy jetken turǵyn úılerdi buzý týraly qanatqaqty baǵdarlama qabyldanǵan-dy.
Atalmysh baǵdarlamaǵa sáıkes, qalanyń 7 aýdanynda bos jer telimderi tabylyp, bul jerlerge kópqabatty turǵyn úıler salynyp, oǵan eski baspanalary buzylatyn turǵyndardy kóshirý kózdelingen. Qysqasy, «Eski úıler» baǵdarlamasy boıynsha jańa páter alýshylar qatary kóbeıip keledi.
Jaqynda Almaly aýdanyndaǵy Áıteke bı kóshesiniń boıynda kóppáterli turǵyn úı jańadan paıdalanýǵa berildi. Qazirgi zaman talaptaryna saı salynǵan bul turǵyn úı kesheni atalmysh baǵdarlama boıynsha salynǵan.
Qala ákimi Ahmetjan Esimov qonystanýshylardy jańa páterlerimen quttyqtap, jyl basynan beri qaraı eski úılerdi almastyratyn jańadan 7 úıdiń paıda bolǵanyn aıtty. Bul – qalada osy baǵdarlama boıynsha jańa úıler berilgen úshinshi aýdan.
Bıylǵy jyly Túrksib aýdanynda «Eski úıler» baǵdarlamasy boıynsha bes úı, qarasha aıynda Medeý aýdanynda 72 páterli bir turǵyn úı paıdalanýǵa berildi. 2014 jyly qalanyń qalǵan tórt aýdanynda 21 úıdiń qurylysy aıaqtalmaq. Almatyda osy joba boıynsha 55 eski úı buzylyp, olardyń turǵyndary jalpy aýmaǵy 27,6 myń sharshy metr bolatyn jańa úılerge kóshiriledi.
Aınash ESALI,
«Egemen Qazaqstan».
ALMATY.