Búgin Qazaqstannyń 12 óńirinde kóktemgi UBT bastaldy, dep habarlaıdy Egemen.kz
«Qazaqstannyń 12 óńirinde testileý bastalady», dep jazdy Ulttyq testileý ortalyǵynyń dırektory Dıdar Smaǵulov Facebook-tegi paraqshasynda.
Onyń aıtýynsha, Qaraǵandy oblysyndaǵy kóktemgi UBT 18 naýryzda ótkiziledi. Bul joly joǵary oqý ornynyń aqyly bólimine túsýdi josparlaǵan talapkerler úshin uıymdastyrylatyn Ulttyq biryńǵaı testileý kompıýter formatynda ótedi. Eger buǵan deıin kóktem aıyndaǵy testileý tek 10 kúnge sozylsa, bıyl qatysýshylarǵa 1 aı ýaqyt berildi. Naýryzdaǵy UBT-ǵa qatysýǵa tirkelý Ulttyq testileý ortalyǵy saıtynda júrgizildi. Pánder sany ádettegideı beseý: úsh mindetti jáne eki beıindik pán boıynsha testileý júrgiziledi. Testileýge jalpy 4 saǵat (240 mınýt) beriledi.
Maksımaldy ball – 140. Testileý elektrondy formatta «bir testilenýshi – bir kompıýter – bir kamera» qaǵıdasy boıynsha ótedi. Sondaı-aq proktorıng júıesi qoldanylady, beınebaqylaý ornatylady. Tulǵany sıfrlyq sáıkestendirý júıesi – Face ID UBT-ǵa qatyspaq bolǵan bóten adamdardy anyqtaýǵa múmkindik beredi. Osynyń barlyǵy akademııalyq adaldyq qaǵıdalarynyń saqtalýyn baqylaýdy kúsheıtýge jaǵdaı jasaıdy UBT ótkizý kezinde sanıtarlyq talaptar saqtalatyn bolady.
Esterińizge sala ketsek, 2021 jylǵy 20 qańtar men 3 aqpan aralyǵyndaǵy UBT qalaýy boıynsha JOO-ǵa aqyly negizde oqýǵa qabyldaný úshin orta bilim berý uıymdarynyń bitirýshi 11 (12) synyp oqýshylaryna;
JOO-ǵa kúndizgi oqý bólimine aqyly negizde qabyldaý úshin UBT nátıjesi boıynsha shekti ball almaǵan, UBT nátıjeleri joıylǵan, beıindi pánder kombınasııasy sáıkes kelmeıtin UBT nátıjeleri bar tulǵalardy kúntizbelik jyly aqyly negizde odan ári qabyldaý úshin;
JOO-ǵa aqyly negizde shyǵarmashylyq daıyndyqty talap etetin bilim berý baǵdarlamalary toby boıynsha bilim alýshy jáne basqa bilim berý baǵdarlamalary tobyna aýysýǵa nıet bildirgen tulǵalar úshin qaǵaz formatta ótkizildi.
Naqty testileýge 116 085 adam qatysty. Ol ótinish berýshilerdiń 96,6 paıyzyn qurady. Onyń ishinde shektik deńgeıden ótkender sany – 57 679 (49,7%).