12, 13, 14 naýryz kúnderi Nur-Sultan qalasy ákimdiginiń Mýzykalyq jas kórermen teatrynda N.Moshınanyń «Dúnıe-Ǵapyl» metafızıkalyq dramasynyń premerasy ótedi.
Bul qoıylym orys dramatýrgi Natalıa Moshınanyń «Svet» atty shyǵarmasynyń jelisinen alynǵan. Teatr rejısseri, Qazaqstannyń eńbek sińirgen qaıratkeri Ashat Maemırov atalǵan týyndyny qazaq tiline aýdaryp, sahnalamaq. Mýzykamen kórkemdegen jáne rejısserdiń assıstenti – Mekan Djýmabaev. Al bas hormeıster – Álıhan Ydyrysov.
Qoıylymnyń janry – metafızıkalyq drama. Metafızıka – barlyq nárseniń arǵy jaǵynda kórinetin jáne kórinbeıtin shyndyq. Arıstoteldiń paıymdaýynsha, ol – barlyq ǵylymdar úshin mindetti nárselerdiń ózgermeıtin jáne sezim múshelerimen emes, oımen ǵana jetkizýge bolatyn eń joǵarǵy bastamalaryn zertteıdi.
«Dúnıe-Ǵapyl» spektakli – barsha adamzatqa ortaq taqyrypty sóz etetin, adam ómiriniń qundylyǵyn alǵa tartatyn týyndy. О́mirdiń túrli-tústi, qyzyldy-jasyldy qyzyǵy da, ábigerge túsip sendelip, sandalyp ótken kúıbeń tirshilik te bul taqyryptyń qasynda mańyzdy emesteı. Metafızıkalyq drama ýaqyttyń qadiri, adamdyq pen adaldyqtyń joly, ár árekettiń jaýaby, ár amaldyń saýaby syndy adamnyń ishki dúnıesindegi mańyzdy mádenı, rýhanı qundylyqtarǵa den qoıýǵa, olardy júgendep, ıgerýge ıtermeleıdi.
Onda Ǵaıyptyń rólin «Daryn» Memlekettik jastar syılyǵynyń laýreaty Aıan О́tepbergen, Abzal Arapov, Asqar Jumabekov somdaıdy. Mazdaqtyń rólin Orazaly Igilik, Ernazar Jańatilek sahnalamaq. Rımmanyń rólin Qazaqstannyń eńbek sińirgen qaıratkeri, 71-shi Halyqaralyq Kann kınofestıvaliniń jeńimpazy Samal Eslıamova men Láıla Temirhan somdaıdy. Jasynnyń rólin «Daryn» Memlekettik jastar syılyǵynyń laýreaty Asylhan Tólepov pen Dinıslam Nurmaǵanbetov oınaıdy. Al Súırik atty keıipkerdiń rólin Dıana Asqar, Jansaıa О́mirbekova, Nuraı Rysbekova sahnalaıdy.