Keshe Premer-Mınıstr Kárim Másimov Bilim jáne ǵylym mınıstrligi ǵylym komıtetiniń “Qazaqstan Respýblıkasynyń ulttyq bıotehnologııalar ortalyǵy” RMK-de boldy, dep habarlady Premer-Mınıstrdiń baspasóz qyzmeti.
Úkimet basshysy mıkroorganızmderdiń respýblıkalyq kolleksııasyn qarap, bıotehnologııalar jáne ósimdikter seleksııasy, ımmýnohımııa jáne ımmýnobıotehnologııa laboratorııalarynyń, sondaı-aq ulttyq bıotehnologııalar ortalyǵy ujymynyń sońǵy bes jyldaǵy negizgi ǵylymı jetistikteri qoıylǵan Ujymdyq paıdalanymdaǵy bıotehnologııalardyń ulttyq ǵylymı laboratorııasynyń jumysymen tanysty.
Odan soń K.Másimov jumys babyndaǵy keńes ótkizip, usynylǵan ǵylymı taldamalardy saraptaý jáne ómirge engizý jóninen múddeli vedomstvolar basshylaryna birqatar tapsyrmalar berdi.
Memleket basshysynyń tapsyrmasy boıynsha ınstıtýtqa salynǵan memlekettik resýrstar ázirge alǵashqy ǵylymı tıimdiligin berýde. Endi ǵylymı taldamalardy is júzindegi nátıjelermen baılanystyrý qajet.
Eń basty másele – nátıje. Nátıjeni tutynýshynyń túpki múddesimen baılanystyratyn bolyńdar. Bul jerde ınnovasııalar da, jańa tehnologııalar da, qazaqstandyq mazmun da, ǵylymdy damytý da, bári de bir arnada toǵysady. Endi alǵa qaraı qozǵalý qajet, dep atap ótti Kárim Másimov.