Atyraýda temir jol vokzalynyń aýmaǵyn keńeıtý josparlanyp otyr. Atyraý qalalyq ákimdigi baspasóz qyzmetiniń málimetinshe, buǵan jolaýshylar sanynyń artýy sebep bolǵan. Sondyqtan, temir jol vokzalyn janyndaǵy avtobeketpen biriktirý kózdelipti, dep habarlaıdy Egemen.kz
Vokzal ǵımaraty 1972 jyly 500 orynǵa eseptelip salynǵan. Alaıda, qazir vokzalǵa kelýshiler sany 6 esege artyp, 3000-ǵa jetken. Jol júrý baǵyty da kóbeıdi. Máselen, atyraýlyq stýdentter Almaty men Nur-Sultanǵa, Mańǵystaý men Aqtóbe qalasyna kóp qatynaıdy. Sondaı-aq Jylyoı aýdanyndaǵy kásiporyndarda vahtalyq ádispen jumys isteıtin jumysshylar da osy vokzaldan jolǵa shyǵady.
«Jolaýshylar aǵynyń kóbeıýine baılanysty vokzaldy keńeıtý josparlanyp otyr. Osyǵan oraı qasyndaǵy avtobeketti vokzalǵa qosyp, aýmaǵyn keńeıtýge bolady. Bul jospar avtobeketti «Qazaqstan temir joly» UK» AQ balansyna alǵannan keıin ǵana júzege asyrylady. Qazir avtobeketti balansqa alý jumysy júrgizilip jatyr. Muny óte tıimdi joba dep esepteımiz», deıdi «Atyraý magıstraldi jeli» bólimshesiniń dırektory Elýbaı Saparov.
Onyń aıtýynsha, aldaǵy ýaqytta oblys ákiminiń bastamasymen «Qazaqstan temir joly» AQ-nyń qoldaýymen «Atyraý-Qurmanǵazy» baǵytyna qatynaıtyn júrdek poıyz iske qosylmaq. Bul da vokzalǵa kelýshilerdiń sanyn arttyrady.
«Vokzal aýmaǵyn keńeıtý jospary iske asatyn bolsa, oblysaralyq avtobýstar úshin avtobeketti basqa jerge aýystyrý máselesi qarastyrylatyn bolady. Biz ony Atyraý qalasy mańyndaǵy «Alaman» bazaryna kóshirýdi oılastyryp otyrmyz. Ázirge naqty sheshim qabyldanǵan joq» deıdi «Smart Atyraý» KMM dırektorynyń orynbasary Rústem Ernııazov.