Parlament Senatynyń Tóraǵasy Máýlen Áshimbaev mýzykant Imanbek Zeıkenovti «Gremmı» syılyǵyn jeńip alýymen quttyqtady. Bul týraly ol óziniń Facebook-tegi paraqshasynda jazdy, dep habarlaıdy Egemen.kz.
«Otandasymyz, talantty mýzykant Imanbek Zeıkenovti «Gremmı» syılyǵyn jeńip alýymen shyn júrekten quttyqtaımyn! Bul – egemen elimiz úshin tarıhı jeńis jáne zor mártebe. Darynymen barsha álemdi tań qaldyrǵan jerlesimizdiń aldaǵy ýaqytta budan da bıik belesterdi baǵyndyra berýine tilektespiz.
Imanbek baýyrymyzdyń jeńisi barsha qazaq jastaryn qanattandyryp, alǵa jeteleıtini sózsiz. Shyn máninde, armany asqaq, maqsaty aıqyn adam úshin alynbaıtyn qamal joq. Eń bastysy, eshqashan armannan qol úzbeı, sol jolda talmaı eńbek ete bilý kerek. Jeńis qutty bolsyn!» dep jazdy M. Áshimbaev.
Eske sala keteıik, buǵan deıin qazaqstandyq mýzykant Imanbek Zeıkenovtiń Grammy syılyǵyn jeńip alǵanyn habarlaǵan bolatynbyz.