Quramyna 50-ge jýyq memleket kiretin Eýropa Keńesiniń sybaılas jemqorlyqqa qarsy kúres salasynda arnaıy konvensııasy bar. Bul qujatta da jemqorlyqqa qatysty jaýapkershilik eki jaqqa – qol astyndaǵy qyzmetker men basshylyqqa teńdeı qarastyrylady.
Alaıda bul elderde jaýapkershilik týraly sóz bolǵanda eń birinshi áleýmettik ádilettilik pen moraldyq ustanymdarǵa tónetin qaýip-qaterge basa mán beriledi. Al bizdiń elde bul zańnyń tolyqtaı júzege asyrylýyna ne kedergi? Sol baıaǵy – sybaılas jemqorlyq. Bul jerde de osy indetten aınalyp óte almaı otyrmyz. Máseleniń máni parany alý-berýde emes, memlekettik qyzmettegi «komandalyq jumys isteý stıline» kelip tireledi. Bir-birin qoldap-qolshaptap, biriniń qylmysyn biri jasyryp-jaýyp otyratyn «komandamen jumys isteý» degen qaǵıdany tolyq joımaıynsha, bul problema aldymyzdan shyǵa bereri sózsiz. Bir sózben aıtqanda, «memlekettik qyzmettegi komanda» jemqorlyqqa jol asha beredi. Qol astyndaǵy qyzmetkerge kez kelgen basshy jaýapty. Burynǵydaı «birinshi basshylyq árbir qyzmetkeri úshin jaýap berýge mindetti emes degen» kózqaras qazirgi ýaqyttyń talabyna saı kelmeıdi. Eger zań oryndalyp, 1-2 laýazymdy tulǵa qyzmetinen ketse, osynyń bárine qoǵam men halyq kýá bolsa, bul másele de ózdiginen rettele bastar edi. Eń bastysy, halyqtyń senimi oıanar edi.
Bul máseleni kúrdelendirip turǵan taǵy bir jaıt – qyzmetke jańadan kelgen basshylardyń kadrlardy sapyrylystyryp, aýystyra bastaýy. Tájirıbesi bar bilikti basshy kadrdyń qadirin bilýi kerek. Osy túıtkilderdiń barlyǵy zańda naqty ári túsinikti etip jazylǵany durys.
Marat BÁShIMOV,
Eýropalyq quqyq jáne adam quqyqtary saraptamalyq ınstıtýtynyń dırektory