Onlaın-rejımde, Qazaqstan men Reseıdiń volonterlik uıymdary kóshbasshylarynyń qatysýymen, volonterlik keńestiń IV otyrysy ótti. Is-sharany reseılik tarap uıymdastyrdy. Bul týraly Aqparat jáne qoǵamdyq damý mınıstrliginiń baspasóz qyzmeti habarlady.
Is-sharaǵa QR Parlamenti Májilisiniń depýtaty Vera Kım, RF eriktiler ortalyqtary qaýymdastyǵy keńesi tóraǵasynyń orynbasary Ivan Radko, Aqparat jáne qoǵamdyq damý mınıstrliginiń Azamattyq qoǵam isteri komıtetiniń tóraǵasy Madııar Qojahmet, BUU Qazaqstandaǵy eriktiler baǵdarlamasynyń úılestirýshisi Nıkıta Shabaev, Rosmolodeja halyqaralyq qyzmetiniń, RF volonterlerdiń utqyrlyǵy ortalyǵynyń, "Uly Dala Eli" QB, "Ulttyq volonterlik jeli" ZTB basshylary jáne Qazaqstan men Reseıdiń volonterlik jáne jastar uıymdarynyń basqa da ókilderi qatysty.
Kún tártibinde birlesken jobalardy iske asyrý, yntymaqtastyq josparyna ózgerister men tolyqtyrýlar engizý jáne V otyrystyń mindetterin aıqyndaý máseleleri talqylandy.
M.Qojahmet Qazaqstannyń otandyq volonterlikti damytýdaǵy jetistikteri týraly aıtyp, qatysýshylardyń nazaryn aldaǵy maqsattarǵa, atap aıtqanda, BUU Bas Assambleıasynyń 75-sessııasynda aıtylǵan volonterlerdi jumyldyrýdyń halyqaralyq jylyn jarııalaý týraly Qazaqstan Prezıdentiniń bastamasyn ilgeriletýge aýdardy. Sonymen qatar, M.Qojahmet reseılik áriptesterin Qazaqstannyń ıdeıasyn halyqaralyq arenada tabysty ilgeriletý úshin qoldaý kórsetýge shaqyrdy.
Esterińizge sala keteıik, volonterlik keńes 2019 jyly Qostanaı qalasynda ótken Qazaqstan men Reseı jastary kóshbasshylarynyń forýmy aıasynda Qazaqstan Respýblıkasynyń Prezıdenti Q.Toqaevtyń bastamasymen alǵash ret qurylǵan bolatyn.
Keńestiń maqsaty – aqparattyq, ádistemelik jáne saraptamalyq damý tájirıbesin keńeıtýge baǵyttalǵan jastar jáne volonterler qozǵalysyn damytý salasyndaǵy yntymaqtastyqty uıymdastyrý.