Búgin Zarına Dııas júlde qory 3,2 mıllıon dollardan asatyn AQSh-taǵy Miami Open týrnıriniń alǵashqy kezeńinde Vınýs Ýılıamsty jeńip, ekinshi kezeńge shyqty, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
Əlem reıtınginde 89-orynda turǵan qazaq sportshysy eki sette (6:2, 7:6) qarsylasyna múmkindik bergen joq. Endi ol ekinshi kezeńde shveısarııalyq Belında Benchıchpen (reıtıngte 12-orynda) kim myqtyny anyqtaıdy.
Osynaý jeńispen búgin Qazaqstan Respýblıkasynyń Mədenıet jəne sport mınıstri Aqtoty Raıymqulova Qazaqstan tennıs federasııasyn, Zarına Dııas pen bapkerin, federasııa Prezıdenti Bolat Jəmıtulyn jəne barsha aqjúrek jankúıerdi quttyqtady.
«Bul qazaq tennısi tarıhyndaǵy eleýli oqıǵanyń biri. Osyndaı halyqaralyq bəsekelerdegi jarqyn sát qazirgi syndarly kezeńde eldiń eńsesin tikteýge zor úles qosady. Memleketimiz únemi buqaralyq sportty damytý, nasıhattaýǵa erekshe kóńil bólip keledi. Zarınanyń búgingi erligi atqarylyp jatqan júıeli jumys pen orasan eńbektiń jemisi dep bilemiz.
Osynaý oraıly sətti paıdalana otyryp, Qazaqstan tennıs federasııasyn, Zarına Dııas pen bapkerin, federasııa Prezıdenti Bolat Jəmıtulyn jəne barsha aqjúrek jankúıerdi shyn júrekten quttyqtaımyn!» dep jazylǵan mınıstrdiń quttyqtaý hatynda.
Aıta keteıik, Zarına men Vınýs osymen ekinshi ret kezdesti. 2015 jyly Sınsınnatıde ótken týrnırdiń alǵashqy aınalymynda Ýılıams 6:7 (6:8), 4:6 esebimen basym túsken. Endi jalpy kezdesýler boıynsha esep 1:1.