Konstıtýsııalyq reforma aıasynda ulttyq zańdardyń halyqaralyq kelisimderden joǵary turýy jáne memlekettik til saıasatyn kezeń-kezeńimen kúsheıtý máselesi kóterildi. Májilis depýtaty Qazybek Isa bul qadamdardy quqyqtyq egemendikti nyǵaıtatyn ári ulttyq múddeni qorǵaýǵa baǵyttalǵan strategııalyq sheshim dep baǵalaıdy, dep jazady Egemen.kz.
«Aq jol» fraksııasynyń ókili damyǵan elder tájirıbesine toqtaldy. Onyń aıtýynsha, AQSh, Germanııa, Fransııa sııaqty memleketterde halyqaralyq sharttar Konstıtýsııaǵa qaıshy kelse, qaıta qaralady nemese oryndalmaıdy.
Erbolat Saýryqov: Ata Zań zııatkerlik menshik quqyqtaryn qorǵaýdy kúsheıtedi
«Osy bap arqyly Memleket basshysy Qasym-Jomart Toqaevtyń 2022 jyly aıtqan «Osydan otyz jyl burynǵy halyqaralyq sharttardy qaıta qaraý kerek» degen bastamasy iske asýy kerek. Eski bılik úshin tıimdi, halyq úshin tıimsiz bolǵan munaı kelisimderinde ketken esemizdi qaıtaryp, el qazynasyn qorǵaýǵa múmkindik týady», dedi depýtat.
Qazybek Isanyń pikirinshe, ulttyq zańdardyń halyqaralyq kelisimderden joǵary turýyn bekitý elimizdi quqyqtyq egemendigi bar, ulttyq múddesin qorǵaı alatyn memleket retinde kúsheıtedi.
N.Áýesbaev: Jańa Konstıtýsııada Prezıdent ókilettiligi bir ret qana 7 jyldyq merzimge bekitiledi
«Sondyqtan bul norma ýaqyt talabyna saı ári strategııalyq turǵydan salmaqty sheshim», dep atap ótti ol.
Depýtat memlekettik til máselesine de arnaıy toqtaldy.
«Parlamentte qazaq tili úshin menen artyq kúresken eshkim joq. Memlekettik til týraly zań qabyldaý jóninde saýal kótergenimde qoldaý bildirmeı, qarsy shyqqandar qazir til jaıly aqyl aıtýǵa kóshti. Búginde Parlamenttiń 90 paıyzy qazaqsha sóıleıdi, ózge etnos ókilderi de memlekettik tilde erkin pikir bildirip júr. Sondyqtan Memlekettik tilimiz ultymyzdy uıystyratyn mártebesi aıqyn tilge aınalýy qajet», dedi Qazybek Isa.
Onyń aıtýynsha, 2024 jyly «Qazaqstan azamattyǵyn alý úshin memlekettik tilden emtıhan tapsyrý kerek» degen norma zańǵa engizildi.
Maqsat Tolyqbaı: Jańa Ata zańnyń qazaq tilindegi nusqasy tolyqtaı qaıta jazyldy
«Bul talap memlekettik qyzmetke ornalasýda da saqtalýy tıis. Testileý júıesin qaıta qarap, mazmunyn tolyqtyrý qajet. «Aq jol» partııasy kótergen bastamalardyń birtindep iske asyp kele jatqany sonyń dáleli», dedi depýtat.
Depýtat sózinde qazirgi geosaıası ahýal jaǵdaıynda til máselesiniń qaýipsizdik faktoryna aınalǵany da aıtylǵan. Depýtattyń paıymynsha, til saıasatyna qatysty kez kelgen sheshim baıyppen, salmaqty túrde qabyldanýy kerek. Bul turaqtylyqty saqtaýdyń mańyzdy tetigi sanalady.