Mádenıet jáne sport mınıstri Aqtoty Raıymqulova jumys barysymen Almatydaǵy IýNESKO uıymy aıasyndaǵy II sanatty Mádenıetterdi jaqyndastyrý halyqaralyq ortalyǵyna bardy, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
Atalǵan ortalyqtyń maqsaty – etnostardyń, mádenıetter men dinderdiń shyǵý tegine arnalǵan irgeli jáne qoldanbaly zertteýler júrgizý; túrli órkenıet pen mádenıettiń ózara áser etýiniń keshendi prosesine múmkindik beretin Uly Jibek jolyn zertteý; halyqaralyq deńgeıde beıbitshilik pen turaqty damý múddesinde mádenıetaralyq dıalog qundylyqtaryn taratý, ǵalymdar men mádenıet qaıratkerleriniń turaqty qoǵamdyq damý baǵytyndaǵy qyzmetin úılestirý.
Mádenıetterdi jaqyndastyrý halyqaralyq ortalyǵy – etnos, mádenıet, jáne dinderdiń shyǵý tegi jaıly irgeli jáne qoldanbaly zertteýler júrgizýge baǵyttalǵan halyqaralyq yntymaqtastyq úshin biregeı platforma.
Ortalyq dırektory Oljas Súleımenov Aqtoty Raıymqulovamen kezdesý aıasynda mádenıet salasyndaǵy zertteýlerdi tıimdi júzege asyrý maqsatynda IýNESKO aıasynda Mádenıetterdi jaqyndastyrý halyqaralyq ortalyǵy men Qazaqstan mádenıetiniń ǵylymı-zertteý ınstıtýtyn biriktirý týraly usynysyn jetkizdi. Aıta keteıik, atalǵan usynys Úkimetke talqylaýǵa usynyldy. Sonymen qatar Oljas Súleımenov ortalyqtyń aldaǵy jyldarǵa arnalǵan jumysy, maqsat-mindetterimen tanystyrdy.
Bıyl Mádenıetterdi jaqyndastyrý halyqaralyq ortalyǵynyń dırektory, tanymal aqyn, memleket jáne qoǵam qaıratkeri Oljas Súleımenovtiń týǵanyna 85 jyl. Aqtoty Raıymqulova is-sapar barysynda osynaý mereıtoı aıasynda josparlanǵan is-sharalarǵa daıyndyqqa erekshe den qoıdy.
Uıymdastyrýshylardyń aqparaty boıynsha keshendi is-sharalar legi ótedi. Mysaly, 9 sáýirde Baıqońyr qalasynda adamnyń ǵaryshqa ushqanyna jáne «Adamǵa tabyn, Jer, endi!» poemasynyń jazylǵanyna 60 jyl tolýyna oraı saltanatty kesh, 17 mamyr Almatyda «My kochýem navstrechý sebe, ýznavaıas v drýgom: Oljas ı sblıjenıe kýltýr» taqyrybynda halyqaralyq ǵylymı konferensııa, 18 mamyr Almaty men Máskeý qalasynda aqynnyń shyǵarmashylyq keshi ótedi.
Oljas Súleımenovtiń jıyrma bir tomdyq shyǵarmalar jınaǵy shyǵarylady. Osy is-sharalar barysynda kópshilik Oljas Súleımenovtiń shyǵarmashylyǵymen tolyq tanysa alady.
Kezdesý sońynda mınıstr «Uly Jibek jolyndaǵy mádenıet pen din» taqyrybyndaǵy ekspozısııamen tanysty.