Búgin Senatta «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasy talqylandy, dep habarlaıdy Egemen.kz.
Áleýmettik-mádenı damý jáne ǵylym komıtetiniń keńeıtilgen otyrysynda zań jobasy retteýshi quraldardy ońtaılandyrý arqyly ishki jáne kelý týrızmin damytýdy yntalandyrýǵa baǵyttalǵandyǵy atap ótildi.
Elimizdiń zańnamasyna sáıkes týrıstik nysandar memleket qoldaýyndaǵy jeke kásiporyndar tizimine engiziledi, sondaı-aq jańa nysandar salý barysynda ınvestısııalyq preferensııalar týraly normalarmen tolyqtyrylady.
«Basymdyqqa ıe týrıstik aımaqtardy jasaý resýrstardy damýdyń eń perspektıvalyq núktelerine baǵyttaýǵa jáne mýltıplıkatıvti áserdiń esebinen týrıstik naryqtaǵy aýmaqtardyń básekege qabilettiligin arttyrýǵa, sondaı-aq týrızm klasteri quramyna kiretin týrıstik uıymdardyń tıimdiligin arttyrýǵa kómektesedi», dedi senator Dınar Nóketaeva.
Talqylaý qorytyndysy boıynsha qujatty Palatanyń qaraýyna jiberý týraly sheshim qabyldandy.