Qazaq óneri úshin Kenen Ázirbaevtyń orny árdaıym bólek. «Eki Kenen týmaıdy, Alataýǵa ekseń de», dep jyrlaǵan ol el men jerdi shyǵarmalaryna arqaý etti. Keıingi urpaqqa kórkem de kelisti mura qaldyrdy.
Jyl saıyn kóne Taraz topyraǵynda Kenen esimin ulyqtaýǵa jáne shyǵarmalaryn nasıhattaýǵa arnalǵan respýblıkalyq «Shyrqa, daýsym!» atty dástúrli ánshiler baıqaýy ótedi. Atalǵan baıqaý talaı ónerpazdyń jolyn ashyp, talantyn ushtady. Bıyl «Shyrqa, daýsym!» baıqaýy óńirde onynshy ret uıymdastyrylyp, jyr alyby Jambyl Jabaevtyń 175 jyldyǵy men el Táýelsizdiginiń 30 jyldyǵyna arnalyp otyr.
Negizinen, sanıtarlyq talaptarǵa sáıkes, baıqaý ótken «Balasaǵun» ortalyq konsert zalynda kórermen bolǵan joq. Biraq ulttyq ónerdi baǵalaıtyn kópshilik úshin onlaın kórsetilim uıymdastyryldy. Eki jylda bir ret ótetin dástúrli ánshiler merekesine bıyl elimizdiń ár qıyrynan otyzǵa jýyq úmitker qatysqan. Bir qýantarlyǵy, onyń bári de jastar eken. Baıqaýǵa Altynbek Qorazbaev, Saıat Medeýov, Aıgúl Qosanova jáne Beıbit Musaev syndy tanymal óner qaıratkerleri qazylyq etip, úmitkerlerdiń ónerin baǵalady. «Bıyl bul dástúrli án baıqaýy onynshy ret ótkizilse, men úshinshi márte tóraǵa retinde qatysyp otyrmyn. Baıqaýǵa jastardyń kóp qatysqany kóńilge medeý boldy. Bul degenimiz – Kenen murasy máńgi ólmeıtindiginiń dáleli», deıdi Altynbek Qorazbaev.
Baıqaýda Kenen Ázirbaevtyń ataqty «Tik shyrqaý», «Shyrqa, daýsym!», «Kóksholaq» sekildi kóptegen ǵajap ánderi oryndaldy. Jalpy, sharada ónerpaz jastar Kenenniń kórkem álemin asha bildi. Nátıjesinde baıqaýdyń bas júldesin almatylyq Ýathan Shattyq jeńip aldy. Sonymen qatar Jambyl oblysy ákiminiń arnaıy júldesi shymkenttik Ulsaıa Bektasqa buıyrdy. Bas júlde men arnaıy júldeni oblys ákimi Berdibek Saparbaev jeńimpazdarǵa ózi tabystady. Sondaı-aq ol Kenen murasy máńgilik ekenin atap ótip, baıqaýda óner kórsetken jas ónerpazdar men olardy daıyndaǵan ustazdaryna alǵys bildirdi. Al Áýlıeata óńirinen qatysqan Erbosyn Qasymbek birinshi oryndy ıelense, ekinshi oryn Almaty oblysynan kelgen Jiger Omarhan men balqashtyq Nurbolat Uzaqbaıǵa berildi. Sondaı-aq júldeli úshinshi orynǵa Taldyqorǵan qalasynan Nurdana Sálimhan men Túrkistan shaharynan Elbol Qýanbek laıyq dep tanyldy. «Shyrqa, daýsym!» baıqaýynda birqatar qatysýshy Alǵys hattarǵa ıe bolsa, úmitkerlerdiń birazy dıplomant atandy. Al birqatar qatysýshy «Kórermen kózaıymy», «Kúmis kómeı», «Jas Úmit», «Jas daryn» jáne «Kóne Taraz» sekildi atalymdar boıynsha marapattaldy. Sondaı-aq keıbir úmitkerler oblystyq mádenıet, arhıvter jáne qujattama basqarmasy men Kenen Ázirbaev atyndaǵy oblystyq fılarmonııanyń arnaıy júldesin ıelendi.
Jambyl oblysy