Ál-Farabı atyndaǵy Qazaq ulttyq ýnıversıtetinde belgili jýrnalıst, ǵalym, saıası ǵylymdar kandıdaty Jumabek Kenjalındi eske alýǵa arnalǵan «Qazaqstan qoǵamyndaǵy aqparattyq úderister: BAQ menedjmenti men marketıngi jáne PR» atty halyqaralyq ǵylymı-tájirıbelik konferensııa ótti. Atalǵan is-sharany IýNESKO, Halyqaralyq jýrnalıstıka jáne qoǵamdyq medıa kafedrasy I Kenjalın oqýlary aıasynda uıymdastyrdy.
Kózi tirisinde J.Kenjalın Ál-Farabı atyndaǵy QazUÝ-da PR, BAQ menedjmenti men marketıngine baılanysty birneshe halyqaralyq ǵylymı-tájirıbelik konferensııalardy ótkizip, jıi-jıi tájirıbesimen bólisip turdy. Onyń «Saıası menedjment jáne baspasózdiń jurtshylyqpen baılanys máseleleri» atty oqý quraly, aqparattyq menedjment pen marketıng salalaryna baılanysty zertteý maqalalary búginde jýrnalıstıka fakýlteti stýdentteriniń ıgiligine qyzmet etýde. J.Kenjalın atyndaǵy «Baspasóz jáne jańa medıa» oqý-shyǵarmashylyq zerthanasy da bolashaq mamandardy ulaǵatty ustazdyń adaldyǵy men kisilik bolmysyna saı tárbıeleý maqsatynda ashylǵan bolatyn.
Konferensııanyń shymyldyǵyn QazUÝ Áleýmettik damý jónindegi prorektordyń mindetin atqarýshy Álııa Másálimova ashyp, buqaralyq aqparat quraldarynyń elimizdiń áleýmettik-ekonomıkalyq, mádenı damýyndaǵy orasan zor róline toqtaldy. Sondaı-aq Prezıdenttiń kóptegen máselege qozǵaý salyp, qalyń el tarapynan qoldaý tapqan «Halyq únine qulaq asatyn memleket» atty tujyrymdamasy jýrnalısterdiń aldyna zor mindetter júktep otyrǵandyǵyn, qazaq qalamgerleriniń qara shańyraǵy – Qazaq ulttyq ýnıversıteti de osy mindetter údesinen shyǵýdy maqsat tutatyndyǵyn basa aıtyp, «Aqparattyq mendjment syndy jańa ǵylymı baǵyttyń negizin qalap, shákirt tárbıelegen mundaı tulǵany keıingi jastarǵa ónege ete otyryp, bolashaq mamandardy tárbıeleý – bizdiń basty paryzymyz», dep sózin qorytyndylady.
Jıyn barysynda jýrnalıstıka fakýltetiniń dekany Saǵatbek Medeýbek Memlekettik hatshy Qyrymbek Kósherbaevtyń, Aqparat jáne qoǵamdyq damý mınıstri Aıda Balaevanyń quttyqtaý-lebizderimen tanystyrdy.
Odan keıin qabyrǵaly qalamgerdiń qysqa ǵumyrynda qaldyrǵan mol murasy men atqarǵan orasan isteri týraly kórkem fılm kórsetildi.
Áserli keshti ári qaraı Parlament Májilisiniń depýtaty Saýytbek Abdrahmanov jalǵady.
«Tamyry tereń oqý orny Ál-Farabı atyndaǵy Qazaq ulttyq ýnıversıteti bolar eldiń balasyna jarasatyn minez – asyldardy ardaqtaý dástúrin berik ustanyp otyr» deı kele, ǵalymnyń tazalyq, tárbıelilik, kishilik, kisilik ustanymdaryna adal bolý arqyly óz boıyndaǵy qasıetterin úlgi etkendigin maqtanyshpen jetkizdi. Al «Tulǵa» jýrnalynyń» bas redaktory Marat Toqashbaev óz sózin «Bul shara ulttyq mádenıetimiz ben jýrnalıstıkamyzdyń aqyldasatyn alańyna aınalady. Júkeńniń búkil shyǵarmashylyq ómiri meniń kóz aldymda ótti. Adamı qasıetterinen úlgi alýǵa tyrystyq. 2018 jyly Jumabek Omarulynyń qurmetine jáne ony eske alý maqsatynda jaryq kórgen «Serke sózdiń sardary» kitabyndaǵy aqtarylyp jazylǵan pikirler arqyly Júkeńniń ózge de qyrlaryn tanydym», dep túıindedi.
Ári qaraı áriptes-dostary Jumabek Kenjalınniń ómiri men shyǵarmashylyǵy, qoǵamdyq qyzmeti týraly tebireniske toly estelikterimen bólisti. Onyń adamı bolmysyn, el aldynda júrgen kóshbasshylyq qasıetin, erekshe qabiletin, eńbekqorlyǵyn, azamattyq tulǵasyn aıqara ashty.
Aıta keteıik, Jumabek Kenjalın oqýlaryn uıymdastyrýdaǵy basty maqsaty: tanym sabaqtastyǵyn jalǵastyryp, aıaýly azamattyń sáýleli ǵumyry arqyly urpaq boıyna úlgi-ónege sińirý, tarıhı tulǵa retinde dáripteý. Bolashaqta bul jıyn dástúrli túrde jalǵasyn tabady.