L.N.Gýmılev atyndaǵy Eýrazııa ulttyq ýnıversıtetiniń 25 jyldyq mereıtoıy aıasynda respýblıkalyq qoǵamdyq-saıası «Aiqyn» gazetiniń arnaıy aýdıtorııasy men «Medıadızaın» zerthanasynyń ashyldy, dep habarlaıdy Egemen.kz.
«Aiqyn» respýblıkalyq qoǵamdyq-saıası gazeti men L.N.Gýmılev atyndaǵy Eýrazııa ulttyq ýnıversıtetiniń ózara áriptestik ári shyǵarmashylyq baılanys ornatylǵan. Gazettiń bas redaktorynyń bastamasymen 2020 jyly jýrnalıstıka jáne saıasattaný fakýltetiniń stýdentterin shyǵarmashylyqqa baýlý maqsatynda «Mentor jáne mentı» jobasy júzege asyryldy.
Jobanyń maqsaty – stýdentterdi túrli saladaǵy saraptamalyq materıal jazýǵa úıretý, úsh aılyq tájirıbeden keıin úzdik tanylǵan stýdentti jumyspen qamtý. Joba barysynda gazet ujymy stýdenttermen kezdesip, ekonomıka, saıasat, rýhanııat, sport, halyqaralyq baılanys jaıly keńes berdi.
«Aiqyn» respýblıkalyq qoǵamdyq-saıası gazeti arnaıy aýdıtorııasyn jasaý ıdeıasy ekijaqty kelisim aıasynda júzege asyryldy. Gazet ujymy óz qarajatyna aýdıtorııany zamanaýı stılde bezendirdi. Onda aqparat keńistigindegi tanymal álemdik basylymdar men otandyq gazetterdiń ataýy men Alash qaıratkerleriniń baspasózge qatysty oılary jazylǵan. Aldaǵy ýaqytta arnaıy aýdıtorııada oqý úderisindegi dárister men gazet ujymynyń arnaıy semınarlary ótedi.
«Medıadızaın» zerthanasy – jýrnalıstıka, baspa isi bilim berý baǵdarlamalary boıynsha bezendirý programmalaryn úırenýge, stýdentterdiń jattyǵý gazetteri men kitaptaryn shyǵarýǵa arnalǵan aýdıtorııa. Zerthanada dızaın jasaýǵa qabiletti jańa kompıýter kesheni, baspa ónimderin daıyndaıtyn túrli quraldar men prınterler, sondaı-aq stýdentterdiń shyǵarmashylyq jumystarynan jasalǵan kórme qoıylǵan.
Zerthanada Adove Premiere, InDesign, CorelDRAW, Adove Photoshop lısenzııalanǵan baǵdarlamalary bar. Onda «Web dızaın negizderi», «Baspa jáne onlaın BAQ dızaıny», «Merzimdi basylymdar dızaıny», «Fotojýrnalıstıka» pánderi boıynsha tájirıbelik jáne zerthanalyq sabaqtar júrgiziledi. Stýdentterdiń shyǵarmashylyq sheberligin ǵana emes, aqparattyq tehnologııa múmkindikterin ıgerýge baǵyttalǵan zerthana bolashaqta ámbebap mamandar daıyndaýǵa qyzmet etedi.