Polısııa departamenti pırotehnıkalyq ónimdi erekshe qorǵalatyn aýmaqta qoldanǵandardy izdestirip jatyr, dep habarlaıdy Egemen.kz mangystaumedia.kz saıtyna silteme jasap.
Erekshe qorǵalatyn aýmaqqa enetin Bozjyra shatqalynda belgisiz bireýler otshashý atqany týraly beınejazba áleýmettik jelide taraǵan edi. Oqıǵany alystan baqylap otyrǵan azamat túsirip alǵan.
Alaıda Oblystyq tabıǵı resýrstar basqarmasynyń basshysy Dúısen Qusbekov otshashý Bozjyrada atylmaǵan bolýy múmkin ekenin aıtty.
«Kúzette bolǵan ınspektorlar Bozjyra shatqalynyń aýmaǵynda otshashýdyń daýysy estilmegenin, izi de joq ekenin málimdedi», deıdi ol.
Basqarma áleýmettik jelide taraǵan vıdeo boıynsha polısııa departamentine hat joldamaq. Eger otshashý atylǵany rastalyp, kúdikti anyqtalsa ákimshilik jaýapkershilikke tartylady.