Oblystyq polısııa departamenti baspasóz qyzmetiniń aqparatyna qaraǵanda, Qyzylorda oblysynyń turǵyny «Teńiz kenishine jumysqa ornalastyramyn» dep 60-qa jýyq adamnyń aqshasyn aldap alǵan, dep habarlaıdy Egemen.kz.
«Jumys izdep, aqshasynan qaǵylǵan turǵyndar alǵashqyda jalǵan kelisimshart jasaǵanyn bilmegen. Sebebi, alaıaqtyq qylmys egjeı-tegjeıli uıymdastyrylǵan. Onyń dáleli – jasalǵan tólemderge berilgen túbirtekter. 39 jastaǵy alaıaq azamattardyń 50 mıllıonnan astam teńgesin qaltasyna basqan. Aldanǵandardyń arasynda atyraýlyqtardan bólek Qyzylorda, Túrkistan, Aqtóbe oblystarynyń turǵyndary da bar», dedi oblystyq polısııa departamentiniń bastyǵy Qamza Úmbetqalıev.
Onyń aıtýynsha, alaıaqtyq áreketke barǵan kúdikti bastapqyda «Talapker & Company» JShS-i arqyly jumys izdep kelgen azamattarǵa laıyqty keńse izdegen. Sóıtip, Qulsary qalasynyń Ortalyq yqsham aýdanynan keńseni jalǵa alǵan. Osylaısha, óziniń qylmystyq pıǵylyn júzege asyrý úshin birneshe qyzmetkerdi eshqandaı kelisimshartsyz jumysqa alyp, olarǵa qolma-qol jalaqy tólep otyrǵan.
«Azamattarmen tikeleı qarym-qatynas ornatý úshin 47 jáne 29 jastaǵy eki tanysyn paıdalanǵan. Kelisimshart úlgilerin kórsetip, ekeýine ár tapqan adamy úshin aqsha beretine sendirgen. Jumysqa ornalasý aqysy 150 000-450 000 teńge aralyǵyn quraǵan. «Talapker&Company» JShS-niń atqarýshy basshysy alaıaqtyq áreketi úshin sot úkimimen 3 jyl 6 aı merzimge bas bostandyǵynan aıyryldy», deıdi Qamza Úmbetqalıev.