Elimiz ekologııalyq taza ónim óndirip, tutynatyn áleýetke ıe. Dese de, áli ımportqa ıek artyp kele jatqanymyz jasyryn emes. Bıyl mal sharýashylyǵy ónimderiniń ımportyn almastyrý jáne qaıta óńdeý kásiporyndarynyń qýatyn arttyrýǵa baılanysty Aýyl sharýashylyǵy mınıstrligi jergilikti atqarýshy organdarmen birlesip, kásiporyndar salý jáne jańǵyrtý boıynsha birqatar ınvestısııalyq jobany iske asyrýdy josparlady. Bul jospar aldaǵy ýaqytta salanyń damýyna tyń serpin berýi múmkin.
Sút óndirisine ınvestısııa – 37,4 mlrd teńge
Byltyr 16,8 myń bas iri qarasy bar jáne jylyna 102,6 myń tonna sút óndiretin ónerkásiptik jáne otbasylyq taýarly sút fermasy qurylyp, jańǵyrtý boıynsha 49 ınvestısııalyq joba iske asyryldy. Onyń ishinde 13,6 myń bas sıyry jáne qýaty jylyna 92,4 myń tonnaǵa deıin sút óndiretin 19 ónerkásiptik taýarly sút fermasy bar ekenin aıta ketken abzal. Bıyl jalpy óndiristik qýaty 99,6 myń tonna sút bolatyn taýarly sút fermalaryn qurý jáne jańǵyrtý boıynsha 41 joba iske asyrylmaq. Sútti maldyń ónimdiligin arttyrý úshin 2020 jyly elge 21 703 bas iri qara mal ákelingen. Onyń 8 367 basy sútti jáne etti baǵyttaǵy iri qara mal. Bul jobalardy tikeleı iske asyratyn «Báıterek» UBH» AQ-tyń enshiles qurylymy «Agrarlyq nesıe korporasııasy» AQ-tyń sońǵy úsh jylda sút salasyna salǵan ınvestısııasy 37,4 mlrd teńgege jetti. 2019 jyldan beri Úkimet sút ónimderiniń ımportyn almastyrý jóninde mindet qoıǵan bolatyn. Árıne, taýarly sút óndirisin ınvestısııasyz damytý múmkin emes. Agroónerkásiptik keshenge salynǵan ınvestısııalar sońǵy bes jylda jylyna orta eseppen 26,8%-ǵa ósti. Bul ósimge de «Agrarlyq nesıe korporasııasy» AQ úlken úles qosty.
Osyndaı sút fermasy jobalarynyń birin Pavlodar oblysynyń Aqsý qalasyndaǵy «KronAgro» JShS iske qosty. Byltyr atalǵan kompanııa 1 200 bas saýyn sıyrǵa arnalǵan taýarly sút fermasyn salý úshin «Agrarlyq nesıe korporasııasyna» júgingen. Jobanyń quny 5,7 mlrd teńgege shyqqan. Onyń 2,8 mlrd teńgesin «Agrobıznes» baǵdarlamasy boıynsha «Agrarlyq nesıe korporasııasy» ınvestısııalady. О́tken jyldyń qyrkúıek aıynda kompanııa fermaǵa Aýstrııa men Chehııadan sımmental tuqymdy sıyr ákeldi. Sharýa qojalyǵy 2022 jylǵa qaraı óndiristik qýatyn kúsheıtip, sút jáne et óńdeý kásiporyndaryn jylyna 7 500 tonnaǵa deıin shıkizatpen turaqty túrde qamtamasyz etýdi josparlap otyr. Kompanııa dırektorynyń aıtýynsha, memleket tarapynan qarjylaı qoldaý kórsetý sharýashylyqty damytýǵa tyń serpin berdi jáne bul – ımportty almastyrýdyń tóte joly.
«Aldaǵy úsh aıda kúnine 25 tonna sút saýyp, tolyq qýatta jumys isteıtin deńgeıge jetemiz dep otyrmyz. Sıyrlarymyz jospar boıynsha týyp jatyr. Bul jobanyń iske asyrylýyna qoldaý kórsetken «Agrarlyq nesıe korporasııasynan» alǵan qarajatqa biz negizinen mal, taýarly sút fermasyna qajet qondyrǵylar men mal azyǵyn daıyndaıtyn tehnıkalar satyp aldyq. Sonymen qatar qazirgi ýaqytta 150 adamdy jumyspen qamtyp otyrmyz. Biz sııaqty sharýashylyqtardyń damýyna memlekettik qoldaý kóp. Ony tıimdi paıdalansaq, otandyq ónimniń kólemin arttyramyz jáne sol arqyly ımportty almastyrýǵa múmkindik týady», deıdi kásiporyn dırektory Dıdar Beısenbaev.
«Agrarlyq nesıe korporasııasy» 2019 jyldan bastap taýarly sút fermalary baǵyty boıynsha jalpy somasy shamamen 37,4 mlrd teńge bolatyn 49 ınvestısııalyq jobany qarjylandyrdy. Onyń ishinde 2020-2021 jyldary jalpy somasy 20,4 mlrd teńge bolatyn 20 jobaǵa qoldaý kórsetken. Qarjylandyrylǵan taýarly sút fermalary jylyna 211 myń tonnadan astam sút óndirdi.
Taǵy bir sút óndiretin kompanııa – Pavlodar oblysynyń Fedorovka aýylyndaǵy «AgroDamý» JShS-i. Kompanııada 192 bas sımmental tuqymdy sıyr bar. Elimizdiń soltústik aımaqtarynyń klımatyna tózimdi bul tuqym sútti mol beredi jáne et jınaý turǵysynan da basqa tuqymdardan artyq.
«Agrarlyq nesıe korporasııasy» tarapynan sharýashylyqty damytýǵa 498 mln teńge qarajat bólindi. Kompanııa bul aqshaǵa joǵary ónimdi mal, zamanaýı jabdyqtar satyp aldy. Búgingi tańda 20 adamǵa jumys berip otyr. Al taýarly sút fermasynyń ónimin Pavlodardaǵy elimiz boıynsha eń iri sút zaýyty satyp alady. Bul kásiporyn jylyna shamamen 4,5 myń tonna sút óndiretin deńgeıge jetýdi josparlap otyr.
«Agrarlyq nesıe korporasııasynyń» Pavlodardaǵy fılıaly ótken 4,5 aıda shamamen 5,6 mlrd teńgeniń jobasyn qarjylandyrdy. Jalpy bıyl 8,8 mlrd teńgeni ıgerý josparlanyp otyr», deıdi «Agrarlyq nesıe korporasııasy» AQ oblystyq fılıalynyń dırektory Ardaq Tańjaryq.