Búginde kópbalaly jáne az qamtylǵan otbasylarǵa memleket tarapynan tıisti qoldaý kórsetilýde. Jyl saıyn taǵaıyndalatyn ataýly áleýmettik kómek te turaqty túrde berilip keledi.
Máselen, bıyl Jambyl oblysynda ataýly áleýmettik kómekpen 95 430 adamdy qamtý josparlanǵan. 1 mamyrǵa deıin ataýly áleýmettik kómek alý úshin 12 690 otbasy ótinish bergen. Alaıda onyń ishinde 3 102 otbasyna kómek taǵaıyndalmaǵan. Al 9 588 otbasyndaǵy 49 063 adamǵa ataýly áleýmettik kómek berilipti. Bul úrdis aldaǵy ýaqytta da jalǵasatyn bolady.
«О́ńir turǵyndarynan 7 658 otbasymen áleýmettik kelisimshart jasalǵan. Ol 41 692 adamdy quraıdy. Sonymen qatar jumyspen qamtýdyń belsendi sharalaryna 1 010 adam tartylyp, onyń ishinde turaqty jumys oryndaryna 325 adam, aqyly qoǵamdyq jumysqa 323 adam, áleýmettik jumys oryndaryna 35 adam, qaıta daıarlaý kýrsyna 1 adam jáne jastar tájirıbesine 1 adam joldanǵan. Jańa bıznes ıdeıalaryn iske asyrý úshin 325 otbasy 200 aılyq eseptik kórsetkish mólsherinde memlekettik grant alǵan. Kepildendirilgen áleýmettik toptamamen ataýly áleýmettik kómek alýshy otbasylardaǵy 1 jastan 6 jasqa deıingi 24 989 bala qamtylady dep josparlanýda. Al qańtar-sáýir aılarynda 1 jastan 6 jasqa deıingi 10 567 bala kepildik berilgen áleýmettik toptamamen qamtamasyz etildi», deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov.
Árıne, memleket tarapynan kópbalaly jáne az qamtylǵan otbasylarǵa tek ataýly áleýmettik kómek qana berilip otyrǵan joq. Sonymen qatar óńirde jergilikti turǵyndardyń áleýmettik jaǵdaıyn eskere otyryp ashylǵan birqatar áleýmettik dúkender bar. Qazirgi kezde Taraz qalasynyń ózinde 14 dúńgirshek jumys istep tur. Onyń ishinde 8 dúńgirshek zamanaýı úlgide jabdyqtalǵan. Oblystyń birqatar aýdandarynda da mundaı nysandar jumys isteıdi. Mundaǵy sórelerge negizinen aýyl sharýashylyǵy taýar óndirýshileriniń ónimderi qoıylyp, naryq baǵasynan 10-20 paıyz tómen baǵada saýdalanýda. Sondaı áleýmettik dúkenniń biri – oblys ortalyǵyndaǵy «Qarasý» alabynda ornalasqan. Munda kelýshiler kóp. Dúken satýshysy, kópbalaly ana Hamıda Saýranbek munda aǵymdaǵy jyldyń aqpan aıynan beri jumys isteıdi eken. Ol shynynda da bul dúkendegi taýarlardyń naryqtaǵy baǵadan áldeqaıda arzan ekenin aıtty. Máselen, munda bir kılo qant 220 teńgeden, bir kılo kúrish 240 teńgeden, bir lıtr suıyq maı 560 teńgeden, nan 85 teńgeden satylýda. Munyń da óńirdegi az qamtylǵan otbasylar úshin aıtarlyqtaı kómek ekeni sózsiz. Endi taǵy da 7 áleýmettik dúken salý josparlanýda. Budan bólek, Taraz qalasynyń aýmaǵyndaǵy «Shóldala» alabynda, sondaı-aq, Jýaly, Baızaq jáne Jambyl aýdandarynda da dúńgirshekter ornatylady.
Osydan eki jyl buryn Taraz qalasynda turatyn kópbalaly jáne az qamtylǵan otbasylarǵa 45 páterlik turǵyn úı tabys etilgen bolatyn. Bala-shaǵasymen jańa baspanaǵa qonystanǵan otbasylardyń qýanyshynda shek bolǵan joq. Bul úrdis búgin de ákimdik tarapynan jalǵasyn taýyp keledi. Oblys ortalyǵyndaǵy «Araı», «Qarasý» jáne 15-shaǵyn aýdandarynda jańa salynǵan turǵyn úılerden júzdegen páter áleýmettik osal toptaǵy azamattarǵa berildi. Jalpy, óńirde kópbalaly jáne az qamtylǵan otbasylardy qoldaý maqsatynda jumystar jalǵasýda.