Qazaqstan Prezıdenti Qasym-Jomart Toqaev Qatar Premer-Mınıstriniń orynbasary – Syrtqy ister mınıstri sheıh Muhammed ben Abdýlrahman Ál Tánıdi qabyldady, dep habarlaıdy Egemen.kz Aqordaǵa silteme jasap.
Kezdesý barysynda qazaq-qatar qatynastarynyń damý perspektıvalary talqylandy. Bul rette saıası, saýda-ekonomıkalyq jáne ınvestısııalyq baılanystardy nyǵaıtýǵa basa mán berildi.
Qazaqstan Prezıdenti ózara qyzyǵýshylyq tanytatyn salalar boıynsha eki el arasyndaǵy qarym-qatynastardy nyǵaıtý úshin zor múmkindik bar ekenin aıtty.
– Sizdiń bul saparyńyzdyń mańyzy óte zor bolady dep oılaımyn. Keleshekte biz ózara yntymaqtastyq baǵytynda úlken nátıjelerge qol jetkize alatynymyzǵa senimdimin. Qazaqstan osyndaı jetistikterge qol jetkizýge múddeli, – dedi Memleket basshysy.
Prezıdent Qasym-Jomart Toqaev Qatar Ámiri sheıh Tamım ben Hamad Ál Tanımen jýyrda telefon arqyly sóılesken kezde qol jetkizilgen ýaǵdalastyq týraly aıtty. Atap aıtqanda taraptar Qatar basshysynyń Qazaqstanǵa josparlanǵan saparynyń qarsańynda birneshe iri ınvestısııalyq jobalardy birlese ázirleý jóninde kelisimge kelgen.
О́z kezeginde, Qatar Premer-Mınıstriniń orynbasary – Syrtqy ister mınıstri Qatar Ámiriniń Qazaqstan Prezıdentine jáne halqyna joldaǵan sálemi men izgi tilegin jetkizdi.
Sheıh Muhammed ben Abdýlrahman Ál Tanı Qasym-Jomart Toqaevqa Qatar Ámiriniń ekonomıka salasyna basa mán bere otyryp, Qazaqstanmen aradaǵy yqpaldastyqty odan ári nyǵaıtý úshin berik negiz qalaýǵa múddeli ekenin bildirdi. Sondaı-aq koronavırýs indetine qarsy qazaqstandyq QazVac vaksınasynyń ázirlenýine baılanysty Qatar basshysynyń quttyqtaýyn jetkizip, atalǵan másele boıynsha kez kelgen kómek kórsetýge daıyn ekenin atap ótti.
Budan bólek Qatardyń syrtqy saıası vedomstvosynyń basshysy Qazaqstan Prezıdenti Qasym-Jomart Toqaevqa Syrtqy ister mınıstri Muhtar Tileýberdimen ótkizgen kelissóz nátıjeleri jóninde, sondaı-aq Qazaqstan tarapynan ınvestısııalyq jobalardy iske asyrýǵa baılanysty birqatar usynys túskeni týraly málimet berdi. Bul rette Qatardyń Ulttyq ál-aýqat qory men ulttyq kompanııalary atalǵan jobalardy zertteý boıynsha belsendi jumys júrgizip otyrǵanyn atap ótti.