Qazirgi kezde qoǵamda jastarǵa qatysty másele kóp. Jastardyń oı-sanasy men kózqarasyn durys qalyptastyrý, ómirge kózqarasyn aıqyndaý da – mańyzdy mindettiń biri. Osy oraıda Taraz qalasyndaǵy Q.Rysqulbekov atyndaǵy saıabaqta jastar arasynda áleýmettik jaýapkershilik pen ekologııalyq mádenıetti qalyptastyrý jáne áleýmettik mańyzy bar ekologııalyq jobalardy qoldaý maqsatynda ÁLEMDI ÓZGERT atty úzdik jobalar baıqaýy ótti.
Atalǵan baıqaýdy Jambyl oblystyq jastar saıasaty máseleleri basqarmasy uıymdastyrdy. Bul shara jastardy ózin ózi tárbıeleýge baýlıdy. Ásirese jastardy ekologııalyq sanany ózgertýge, jaqsy men jamandy saralaı bilýge shaqyrady.
«Jobalardyń bárin de qarap shyqtyq. Jastar atalǵan jobaǵa tyń ıdeıalar usynǵan. Sonymen qatar ártúrli baǵyttaǵy máselelerdi de qamtyǵan. Osyndaı baıqaýlarǵa turaqty qatysyp turatyn jastarymyz da jeterlik. Úzdik dep tanylǵan jobalar aldaǵy ýaqytta qoldaý taýyp, iske asyrylady degen senimdemin. Jobaǵa kez kelgen jas óz jumysyn usyna alady», deıdi qazylar alqasynyń múshesi Ashat Oljabaı.
Baıqaýǵa óńirdegi joǵary jáne arnaýly oqý oryndarynan 15 stýdent qatysyp, óziniń qazaq jáne orys tilderindegi pýblısıstıkalyq jumystaryn usynǵan. Qazylar alqasynyń sheshimine sáıkes «Áleýmettik baǵyttaǵy máseleler» atalymy boıynsha Halyqaralyq Taraz ınnovasııalyq ınstıtýtynyń stýdenti B.Asqar, «Quqyqtyq baǵyttaǵy máseleler» atalymy boıynsha «Taraz-Bolashaq» joǵary medısınalyq kolledjiniń stýdenti D.Berekeeva, «Ekologııalyq baǵyttaǵy máseleler» atalymy boıynsha Halyqaralyq Taraz ınnovasııalyq ınstıtýtynyń stýdenti Sh.Júsipov jáne «Áskerı baǵyttaǵy máseleler» atalymy boıynsha M.H.Dýlatı atyndaǵy Taraz óńirlik ýnıversıtetiniń stýdenti E.Iýsýpov jeńimpaz atandy. Jeńimpazdarǵa uıymdastyrýshylar tarapynan arnaıy dıplomdar men baǵaly syılyqtar berildi.
«Men usynǵan joba áleýmettik máselelerdi sheshýge baǵyttalǵan. Búgingi qoǵamda ajyrasý beleń alyp otyr. Jobada otbasy qundylyqtaryn saqtaý jáne ajyrasýdy azaıtýdyń joldary usynyldy. Aldaǵy ýaqytta da áleýmettik máselelerge baılanysty uıymdastyrylǵan túrli baıqaýlarda belsendilik tanytamyn», deıdi baıqaý jeńimpazy B.Asqar.
Jambyl oblysy