Bozaevtar áýletin Jezqazǵan qalasynyń jurtshylyǵy polıseıler otbasy dep biledi. Áýlettiń aqsaqaly Dýman Bozaev – sanaly ǵumyryn ishki ister salasyna arnaǵan jan. Aǵalarynyń izin basqan úsh inisi Dýlat, Samat jáne Islam Bozaevtar da ıyqtaryna pogon taǵyp, quqyq qorǵaý qyzmetiniń ystyǵyna kúıip, sýyǵyna tońǵan bilikti mamandar. Búginde olardyń barlyǵy ishki ister organdarynyń ardaqty ardagerleri. Al áke men aldyńǵy tolqyn aǵalarynyń jolyn qazir Aqsultan Dýmanuly jalǵastyryp keledi.
Aqsultan – Jezqazǵan qalasynyń polısııa basqarmasy Jergilikti polısııa qyzmetiniń ýchaskelik polısııa ınspektory, polısııa kapıtany. Arlan men Álınur esimdi qos qulynshaqtyń ákesi. Shańyraǵynyń jylylyǵyn saqtap, jaryǵyn eselep otyrǵan Mereıdeı arýdyń arqasúıer azamaty. Áke jolyn abyroımen jalǵastyryp kele jatqan ul. Eń bıigi ol – egemen el bolýdyń, bostandyqtyń baqytyn sezinip ósken, qadirin shyn túsingen urpaq. Táýelsizdiktiń týyn kótergen qurdasy!
Aqsultannyń ákesi Dýman Bozaev polısııada 20 jyl eńbek etip, 2011 jyly zeınetkerlikke shyǵady. Dál osy jyly uly el aldynda adal qyzmet etýge ant berip, tártip saqshylarynyń sapyna qosylady.
«Áke jolyn jalǵastyrý – óz tańdaýym» degen ol bala kezden polısııa qyzmetkeri bolýdy armandaǵanyn aıtady. «Bala kezimnen ákemniń formasyna qatty qyzyǵatynmyn. Ol kisiniń jumysyna degen adaldyǵy men jaýapkershiligin erte jastan sezinip óstim. «Ákemdeı polısııa bolsam» degen armannyń jeteginde júrip er jettim. Es bilip, aqyl toqtatar jasqa kelgende men de asqar taýymnyń jolyn jalǵastyryp, aǵalarymnyń izin basamyn dep sheshtim», deıdi aǵynan jarylǵan Aqsultan.
«Polısııa qyzmetkeri bolý men úshin abyroı ǵana emes, mindet jáne erlikke para-par. О́ıtkeni ózgelerge qaraǵanda bul salada meniń úlgi tutar ákem men boıym men oıymdy túzer aǵalarym boldy. Elge adal qyzmet etýdi otbasymda qalyptasyp qalǵan osyndaı qaǵıdattarǵa qarap boıyma sińirdim», degen Aqsultan anasy týraly da perzenttik aq kóńilin bildirdi.
«Anam Aıjan mektepte muǵalim bolyp jumys isteıdi. Ol kisiniń ákeme degen qurmeti erekshe. Ekeýiniń syılastyǵyn, tatýlyǵyn kórip óskendikten bolar, ul-qyzdarynyń ata-anaǵa degen qurmeti ómirde qandaı jaǵdaı bolsa da ortaıǵan emes. Shyndap kelgende, biz ákemizdiń qas-qabaǵyna qarap tárbıe aldyq, anamyzdyń meıirimine shomylyp er jettik. Anamnyń «ákeń biledi» jáne «ákeńmen aqyldas» degen eki aýyz sózin estip, qulaqqa quıyp óstik. Odan jaman bolǵan joqpyz», deıdi polısııa kapıtany.
«Otbasymyzda ákem bizdi únemi birlik pen tatýlyqqa, sabyrlyq pen tártipke shaqyryp otyrady. Ásirese ol kisi qyzmetti adal istep, jumysta tııanaqty bolýǵa, mindetterimizge jaýapkershilikpen qaraýǵa erekshe mán beredi. «Polısııa qyzmetkeri – eldiń aldynda júretin maman. Sondyqtan ne isteseńder de nıetteriń aq, peıilderiń taza bolsyn. О́ıtkeni halyqtyń qyraǵy kózi bárin kórip, sergek kóńili jaqsy men jamannyń barlyǵyn súzgiden ótkizip otyrady» degendi jıi aıtady. Ol kisiniń bizge únemi aıtatyn bir keńesi bar. Ol – «Jeti ret ólshep, bir ret kes» jáne «Kelisip pishken ton kelte bolmaıdy» degen sózderi», degen uly kez kelgen jaǵdaıda eń birinshi ákesimen aqyldasyp, birge sheshim shyǵarýdy ádetke aınaldyrǵanyn da aıtady.
Aqsultan Bozaev jaýapty ýchaskelik aýmaqta búginde 3 myńnan astam halyq turady. Jyl basynan beri aýmaqta bir aýyr qylmys tirkelse, 700-den astam adam ákimshilik quqyq buzýshylyq jasaǵany úshin jaýapqa tartylǵan. «Ýchaskelik ınspektor retinde meniń basty mindetim – qylmystyń aldyn alý, turǵyndar arasynda profılaktıkalyq jumystar júrgizý. Qyzmet barysynda túrli jaǵdaılar bolady. Túrli adam, túrli minez, túrli taǵdyr bar. Ásirese ishimdik iship alyp, úıiniń berekesin alatyn eserler kóp. Jaqyndarynyń tynyshtyǵyn ketirip, otbasynda bir-biriniń qadirin bilmeıtin shańyraqtar da, ókinishke qaraı, az emes. Araqqa salynyp, ar-uıattan attap júrgender týǵan-týystarynyń turmaq, zań ókili retinde bizdiń ózimizge de tarpa bas salatyn kezder bolady. Al tirkelgen quqyq buzýshylardyń ishinde turmystyq zorlyq-zombylyq faktiler jıi ushyrasady», deıdi tártip saqshysy.
Áńgimege aralasqan Aqsultannyń ákesi Dýman aqsaqal: «Mamandyq tańdaý – adam ómirindegi eń mańyzdy qadamdardyń biri. Sol sebepti de bul tańdaýdy júrekpen, jaýapkershilikpen jasaý qajet. Ishki ister organdaryna men de óz qalaýymmen keldim. Ár kúni qym-qýyt, qıyndyǵy men jaýapkershiligi qatar júretin polısııada mindetimdi abyroımen atqardym. Búginde mine, Allaǵa shúkir beınettiń zeınetin kórip otyrmyn. Osynyń ózi baqyt emes pe?!», deıdi keýdesin maqtanysh kernep. «Ulymnyń izimdi jalǵap, osy qyzmetke kelgeni – árıne, men úshin zor maqtanysh. Alaıda ár ýaqyttyń bul qyzmetke artar óz talap-mindeti bolady. Ulymnyń sol mejeden tómendemeı, abyroıly qyzmet etkenin tileımin» degen Dýman Bozaev «Polısııa áýletinde eń birinshi temirdeı tártip bolǵany durys» degen pikirin de bildirdi.
«Qazirgi jastar sportqa kóp kóńil bóle bermeıdi. Súıikti isińmen aınalysýǵa kóbine ýaqyt ta jete bermeıdi. Alaıda qazirgi ýaqyt tehnologııanyń damyǵan zamany ǵoı. Búginde polısııa qyzmetkerleri úshin barlyq jaǵdaı jasalǵan. Áleýmettik qoldaý kórsetilip, jumysty jeńildetý úshin búkil sharalar jasalyp keledi. Qyzmettegi jas býynǵa tek óz isine adal bolyp, eńbek etý ǵana qalyp otyr. Sondyqtan artymyzdan ergen jas býynǵa tek abyroı tileımin. Al abyroıly bolý úshin jumysyńa adal bolýyń qajet. Otanymyzdyń tynyshtyǵy úshin tynbaı eńbek etip júrgen barsha tártip saqshylaryn kásibı merekeleri – polısııa kúnimen quttyqtaımyn. Eń bastysy, otbasylaryńyz aman bolsyn!», dep oıyn aq batamen aıaqtady aqsaqal.