Qazaqstandaǵy «Capital Bank Kazakhstan» bank lısenzııasynan aıyryldy. Bul týraly Egemen.kz Qarjy naryǵyn retteý jáne damytý agenttigine silteme jasap habarlaıdy.
QR Qarjy naryǵyn retteý jáne damytý agenttigi Basqarmasynyń 2021 jylǵy 24 maýsymdaǵy № 74 qaýlysyna sáıkes Capital Bank Kazakhstan» AQ-ty bank jáne ózge de operasııalardy jáne baǵaly qaǵazdar naryǵynda qyzmetti júrgizýge berilgen lısenzııasynan aıyryldy.
Lısenzııadan aıyrý kúngi jaǵdaı boıynsha Bank aktıvteriniń mólsheri 38,5 mlrd teńgeni, nesıe portfeli – 33,9 mlrd teńgeni qurady, onyń ishinde 30,4 mlrd teńge nemese Banktiń nesıe portfeliniń 89,8%-y – 90 kúnnen astam merzimi ótken jumys istemeıtin kredıtter.
Banktiń ótimdi aktıvteriniń mólsheri 149 mln teńgeni quraıdy, bul rette oryndalmaǵan klıenttik tólemderdiń kólemi 15,0 mlrd teńgeden asady. Prýdensııalyq normatıvterdi oryndamaýyna baılanysty Agenttik Bankke qatysty 29 qadaǵalap den qoıý sharasyn qabyldap, 67 ákimshilik quqyq buzýshylyq týraly hattama jasady. 2020 jyly Bank aksıoneri Banktiń qarjylyq jaǵdaıyn jaqsartý jónindegi is-sharalar josparyn usyndy.
Kórsetilgen Jospardy oryndaý sheńberinde Agenttiktiń qatań baqylaýymen Bank 2020 jáne 2021 jyldary Banktiń depozıtorlar aldyndaǵy 31 mlrd teńge somasyndaǵy mindettemelerin tómendetti.
Jospardy iske asyrý sheńberinde áleýmettik turǵydan mańyzdy mekemeler (mektepter men aýrýhanalar) aldyndaǵy mindettemeler tolyǵymen jáne kvazımemlekettik sektor aldyndaǵy mindettemelerdiń aıtarlyqtaı bóligi de óteldi. Alaıda, Bank jáne onyń aksıoneri qabyldaǵan sharalar Banktiń qarjylyq jaǵdaıyn turaqtandyrýǵa ákelgen joq. Bank prýdensııalyq normatıvterdi buzýdy jalǵastyrýda jáne Bank klıentteri aldyndaǵy tólemder men aýdarymdar boıynsha mindettemelerin oryndamaıdy. Bank salymshylarynyń, jeke tulǵalardyń 99%-nyń depozıtteri «Qazaqstannyń depozıtterge kepildik berý qory» AQ-tyń kepildigimen tolyq kólemde óteledi.
Agenttik Tóraǵasynyń 2021 jylǵy 24 maýsymdaǵy №206 buıryǵymen ýaqytsha ákimshilik taǵaıyndaldy, oǵan Banktiń barlyq basqarý organdarynyń ókilettikteri aýysty. Ýaqytsha ákimshilik Banktiń taratý komıssııasy taǵaıyndalǵanǵa deıin áreket etetin bolady.
Ýaqytsha ákimshiliktiń basshysy bolyp Agenttiktiń qyzmetkeri Sholpan Taıshyqqyzy Toqseıitova taǵaıyndaldy. 2021 jylǵy 25 maýsymnan bastap QR zańnamasynda kózdelgen jaǵdaılardy qospaǵanda, klıentterdiń jáne Banktiń óziniń bank shottary boıynsha barlyq operasııalar toqtatyldy.
Agenttik zańnamada belgilengen tártippen sotqa Banktiń qyzmetin májbúrlep toqtatý (taratý) týraly ótinishpen júginedi. Sot Bankti májbúrlep taratý týraly is qozǵaǵan kúnnen bastap Bankti ustaýǵa arnalǵan aǵymdaǵy shyǵystarmen baılanysty talaptardy jáne Qazaqstan Respýblıkasynyń zańnamasynda belgilengen ózge de jaǵdaılardy qospaǵanda, kredıtorlardyń Bankke talaptary taratý óndirisinde ǵana qoıyla alady.
Barlyq qyzyǵýshylyq tanytqan suraqtar boıynsha «Capital Bank Kazakhstan» AQ-tyń ýaqytsha ákimshiligine +7 (727) 331 66 77 telefony arqyly habarlasýǵa bolady.