QR Premer-Mınıstri Asqar Mamın «Tyson Foods» halyqaralyq bıznes jónindegi prezıdenti Krıstofer Langholspen kezdesý ótkizdi, dep habarlaıdy Egemen.kz.
Kezdesýde Qazaqstanda zamanaýı agro-mýltıproteın ındýstrııasyn damytý máseleleri talqylandy.
QR Premer-Mınıstri A. Mamınniń AQSh-qa sapary barysynda 2019 jylǵy jeltoqsanda qol qoıylǵan kelisimge sáıkes «Tyson Foods» qazaqstandyq «Kusto Group» kompanııasymen birlesip Qazaqstanda sıyr eti óndirisiniń tolyq sıklin ashýdy josparlap otyr. Osylaısha, birinshi kezeńde QR-da ónimdiligi táýligine keminde 2 myń basty quraıtyn zamanaýı et óńdeý keshenin salý kózdelgen. Kásiporyn qazaqstandyq naryqtyń qajettilikterin qamtamasyz etip qana qoımaı, sonymen qatar ónimdi shetel naryqtaryna da eksporttaıtyn bolady.
Jobany iske asyrý et ındýstrııasyn jáne AО́K-tiń basqa da irgeles salalaryn – veterınarııany, agrarlyq mashına jasaýdy, jemshóp daqyldaryn ósirýdi, bordaqylaý alańdaryn qurýdy jáne t. b. damytýdy yntalandyratyn bolady. Qazaqstannyń aýyl sharýashylyǵynda on myńdaǵan jańa jumys orny ashylady. О́ndiristik sıkl amerıkalyq «Ekstenshn» qyzmetiniń modeli boıynsha qazaqstandyq fermerlerge aqparattyq-konsýltasııalyq qyzmet kórsetýmen súıemeldenetin bolady, bul konsýltasııa berýdi, jergilikti jerlerde kadrlardyń biliktiligin arttyrýdy jáne kásiptik-tehnıkalyq oqytýdy qamtıdy.
«Tyson Foods» kompanııasynyń negizi 1935 jyly qalanǵan, kompanııa aınalymy $43,1 mlrd quraıdy, qyzmetkerler sany – 139 myń adam.