Bul týraly áleýmettik jelide vıdeo tarady. Oqıǵa 4 shildede Qyzylqoǵa aýdanyndaǵy Saǵyz stansasynda bolǵan, dep habarlaıdy Egemen.kz.
Saǵyz stansasyndaǵy jelilik polısııa bóliminiń bastyǵy Bolatbek Ińirbaıdyń aıtýyna qaraǵanda, jergilikti jastar áskerden oralǵan sarbazdy kútip alý úshin vokzalǵa jınalǵan.
«Poıyzben jarysa júgirgen jastar aýdan ortalyǵynan, ózge eldi mekender men okrýgtegi 3-aýyldan kelgen. Olar poıyz toqtaǵansha shydamsyzdyq tanytqan», deıdi Bolatbek Ińirbaı.
Onyń málimetinshe, Saǵyz aýylynyń 18-19 jastaǵy eki turǵyny vagon esiginiń basqyshyna jarmasqan. Olarǵa qatysty QR Ákimshilik quqyqbuzýshylyq týraly Kodekstiń 560-babymen (Temirjol kóligi quraldaryn paıdalaný qaǵıdalaryn buzý) ákimshilik hattama toltyrylyp, 5 aılyq eseptik kórsetkish (14 585 teńge) kóleminde aıyppul salyndy.