Búgin ótip jatqan sybaılas jemqorlyqqa qarsy is-qımyl agenttiginiń alqa májilisinde vedomstvo basshysy birinshi jartyjyldyqtaǵy jumys qorytyndylary týraly aıtyp berdi, dep jazady Egemen.kz.
Agenttik tóraǵasynyń aıtýynsha, statıstıka sybaılas jemqorlyq qylmystaryn tirkeýdiń 35%-ǵa, 1540-tan 1005-ke deıin tómendegenin kórsetedi.
Sonymen qatar aǵymdaǵy jyldyń 6 aıynda 658 adam qylmystyq jaýapkershilikke tartyldy, olardyń 61-i – respýblıkalyq jáne oblystyq deńgeıdegi basshy jáne vıse-mınıstr, úsheýi – sýdıa, jeteýi – óńirlik ákim men olardyń orynbasarlary. Agenttik Tóraǵasy keltirilgen zalaldyń ótelgeni týraly aıtty. Osylaısha, qazirgi kezde belgilengen zalaldyń 15 mlrd teńgesi óteldi.
Sondaı-aq onyń aıtýynsha, bıznes isterine zańsyz aralasýdyń 60 jaǵdaıy, kóleńkeli ekonomıka sýbektilerine qamqorlyq jasaýdyń 45 faktisi, júıeli sybaılas jemqorlyqtyń 61 faktisi anyqtaldy.
M. Ahmetjanov pandemııamen kúreske qarajat jumsaýǵa baılanysty 104 sybaılas jemqorlyq quqyq buzýshylyq anyqtalǵanyn aıtty. Onyń aıtýynsha, medısınalyq jabdyqty satyp alý kezinde de teris paıdalaný jáne urlaý faktileri áli de jalǵasyp jatyr.
«Mysaly, Shymkentte Densaýlyq saqtaý basqarmasy basshysynyń orynbasary Myrzaqulov affılırlengen kompanııalar arqyly medısınalyq tehnıkany joǵary baǵamen satyp alý faktisi boıynsha sottaldy. Shyǵyn 1,5 mlrd teńgeni qurady. Osyǵan uqsas faktiler úshin Mańǵystaý oblysynda densaýlyq saqtaý basqarmasynyń basshysy Jamanbaeva sottaldy», dedi ol.
Sondaı-aq ol medısına qyzmetkerlerine ústemeaqyny maqsatty bólýdi baqylaý týraly aıtty. Munda táýekel tobyna jatpaıtyn adamdarǵa ústemeaqy esepteý, jumys istegen saǵattardy tirkeý jáne qarapaıym dárigerlerden basshylardyń aqsha alýy faktileri anyqtalǵan. Atap aıtqanda, Almaty oblysynda aýdandyq Eńbekshiqazaq aýrýhanasynyń bas dárigeri jáne onyń eki orynbasary ústemeaqy belgileý úshin qol astyndaǵylardan júıeli para alý shemasyn uıymdastyrǵan. Agenttik tóraǵasynyń aıtýynsha, bul salada barlyǵy 104 sybaılas jemqorlyq quqyq buzýshylyq anyqtalǵan.