Londondaǵy «Ýemblı» fýtboldan Eýropa chempıonatynyń fınalyn qabyldady. Italııa men Anglııa quramalary kári qurlyq chempıony ataǵyna talasqan. Negizgi ýaqyt 1:1 esebimen teń aıaqtalyp, penaltı serııasynda Italııa quramasy basym tústi, dep habarlaıdy Egemen.kz.
Aǵylshyndar jyldam gol soqty. Oıynnyń nebári 2 mınýtynda Lıýk Shoý ǵalamat gol soqty. Bul «Manchester Iýnaıted» qorǵaýshysynyń ulttyq qurama sapyndaǵy alǵashqy goly ekenin de aıta ketý kerek. Aıtpaqshy, Shoýdyń goly – Eýropa chempıonaty tarıhyndaǵy eń jyldam gol. Ol match bastala salysymen 1 mınýt 57 sekýndtan soń esep ashty. Buǵan deıingi rekord ıspan fýtbolshysy Hesýs Peredaǵa tıesili edi. 1964 jylǵy dodada ol 5 mınýt 17 sekýndta mergendik tanytqan.
Esep 67 mınýtqa deıin ózgerissiz turdy. 67 mınýtta Italııa quramasynyń qorǵaýshysy Leonardo Bonýchchı gol soǵyp, jaǵdaıdy teńestirdi. Komandalar qosymsha ýaqytta da jeńimpazdy anyqtaı almaı, penaltı serııasyna júgindi. Lotoreıada Roberto Manchını shákirtteri 3:2 esebimen jeńip ketti. Sońǵy sátte Pıkford Italııa oıynshysy Djordjınonyń soqqysyn qaıtaryp, úmit otyn oıatqan. Alaıda sońǵy bolyp dopqa jaqyndaǵan aǵylshyn quramasynyń jas oıynshysy Saka soqqysynyń traektorııasyn Donnarýma dál tapty.
Bul Italııa quramasynyń Eýropa chempıonatyndaǵy ekinshi jeńisi. Sońǵy ret 1968 jyly jeńiske jetken edi. Al Anglııa quramasy týrnır fınalyna tuńǵysh ret shyqty jáne onysy sátsiz aıaqtaldy.
Italııa toptyq kezeńdegi úsh oıynnan tolyq 9 upaı jıyp, pleı-off kezeńine senimdi shyqqan bolatyn. Odan ári qaraı da Roberto Manchını shákirtteri jankúıerler senimine selkeý túsirgen joq. Ár kezdesý saıyn baby kelisken, baǵy shapqan quramaǵa aınalǵanyn dáleldeýmen boldy. 1/8 fınalda Beıl bastaǵan Ýels jigitterin 2:1 esebimen jeńse, shırek fınalda kópshilik úmit kútken Belgııadan da dál osy eseppen basym tústi. Jartylaı fınalda Ispanııa quramasymen ıtjyǵys tústi. Alaıda penaltı serııasynda Lýıs Enrıke shákirtterine qaraǵanda dopty túzý tebetinderin baıqatty. Sóıtip, fınalǵa kelgen edi.
Anglııa da óz tobynda birinshi oryn aldy. Jıǵany – 7 upaı. Aǵylshyndardy toptyq kezeńde apyryp-japyryp óner kórsetpeı-aq, tipti topyrlatyp gol da soqpaı-aq fınalǵa shyǵýǵa bolatynyn dáleldeı alǵan biregeı ujym dese de bolǵandaı. Olar Horvatııany 1:0 esebimen jeńse, Shotlandııamen teń tústi (0:0), toptaǵy sońǵy matchta cheh quramasyn taǵy da 1:0-men jeńe aldy. 1/8 fınalda nemis fýtbolshylary málim de beımálim aǵylshyndarǵa qarsy aıla jasaı almady. Bul oıyn 2:0 esebimen Saýtgeıt komandasynyń jeńisimen aıaqtalyp edi. Al shırek fınalda Ýkraınany 4:0 esebimen oısyrata jeńdi. Odan soń jartylaı fınalda Danııa quramasymen jolyqty. 1992 jylǵy erlikti qaıtalaýǵa baryn salǵan dat jigitteri aǵylshyn fýtbolshylarynyń osal tusyn taba alǵan joq. Esep 2:1, Anglııa quramasynyń paıdasyna. Ekstra-taımda penaltıdi sátti oryndaǵan kapıtan Hárrı Keın óz quramasyn fınalǵa alyp shyqty.
Eýropa chempıonatyn jarty joldan támamdaǵanyna qaramastan Krıshtıaný Ronaldý men Patrık Shık (Chehııa) týrnırdiń bas surmergenderi atandy. Ekeýiniń de enshisinde 5 goldan bar. Nátıjeli pas berý boıynshy Shveısarııa quramasynyń oıynshysy Stıven Sýberge teń keler eshkim bolǵan joq. Ol týrnır barysynda tórt ret golǵa aınalar pas asyrǵan eken.