Bokstan Qazaqstan komandasynyń múshesi Abylaıhan Júsipov Tokıodaǵy alǵashqy jattyǵý kúnderi qandaı deńgeıde ótip jatqanyn aıtty, dep habarlaıdy Egemen.kz Olympic.kz saıtyna silteme jasap.
«Japonııanyń astanasy Tokıo qalasyna kelip, olımpıadalyq aýylǵa ornalastyq. Munda sportshylarǵa kerekti dúnıeniń bári de bar. Bar jaǵdaı jasalǵan. Rıo Olımpıadasyna da qatysqanymdy bilesizder. Eger salystyrmaly túrde qarasaq, eki eldegi uıymdastyrý deńgeıi uqsas», dedi bokser.
Olımpıada qalashyǵyndaǵy alǵashqy jattyǵý kúnderi oıdaǵydaı ótip jatqanyn da tilge tıek etti.
«Tokıoda jattyǵýdy bastap kettik. Arnaıy trenajer zaly da bar eken. Barlyq erejelerdi saqtap júrmiz. Kúnine birneshe ret PTR test tapsyramyz. Árıne, bul azdap jalyqtyrady. Degenmen, barsha álem pandemııamen kúresip jatqandyqtan, bul talapqa moıynsunamyz», deıdi Abylaıhan Júsipov.